Të paktën 16 persona kanë humbur jetën dhe më shumë se 130 të tjerë janë plagosur nga një sulm i dyfishtë rus me dronë në Krivi Rih të Ukrainës, ndërsa ekipet e shpëtimit vijojnë kërkimet nën rrënojat e një qendre tregtare.
Sipas guvernatorit të rajonit të Dnipropetrovskut, Serhii Lisak, mes të plagosurve janë 22 fëmijë. Rreth 29 persona ndodhen në gjendje të rëndë, përfshirë pesë fëmijë.
Në orët e para të së shtunës, autoritetet njoftuan se nëntë persona konsiderohen ende të zhdukur, mes tyre dy fëmijë. Ekipet e emergjencave po vijojnë kërkimet në rrënojat e qendrës tregtare.
Presidenti ukrainas Volodymyr Zelenskyy e cilësoi sulmin “cinik dhe të neveritshëm”. Sipas tij, një dron i dytë rus goditi qendrën tregtare rreth 30 minuta pas sulmit të parë, duke ngritur dyshime se objektivi mund të kenë qenë edhe ekipet e shpëtimit që po ndërhynin pas goditjes së parë.
“Sulme të tilla nuk janë asgjë më pak se akte terroriste”, deklaroi Zelenskyy, duke kërkuar që komuniteti ndërkombëtar ta mbajë Rusinë përgjegjëse.
Në një tjetër sulm të ndodhur të premten, në rajonin jugor të Mykolaivit, të paktën katër persona, përfshirë tre fëmijë, u vranë nga një goditje me dron rus, ndërsa një grua u plagos.
Krivi Rih është qyteti i lindjes së presidentit ukrainas Zelenskyy.
/vizionplus.tv
