Një valë e re tarifash amerikane ndaj një game të gjerë mallrash kanadeze ka hyrë në fuqi që prej mesnatës së së shtunës, pasi negociatat tregtare mes Kanadasë dhe Shteteve të Bashkuara dështuan në minutat e fundit.
Kryeministri kanadez Mark Carney njoftoi pezullimin e bisedimeve pak para skadimit të afatit, duke deklaruar se ndryshimet e fundit në kushtet e propozuara nga SHBA-ja ishin “të padrejta” dhe vinin në pikëpyetje besueshmërinë e një marrëveshjeje të mundshme. Carney deklaroi se Kanadaja do të vendosë tarifa reciproke ndaj mallrave amerikane, “dollar për dollar”.
Bisedimet mes dy vendeve kishin vijuar intensivisht prej korrikut, pasi presidenti amerikan Donald Trump kishte kërcënuar me tarifa deri në 50% ndaj importeve kanadeze. Në fillim të javës, Trump i kishte pezulluar përkohësisht masat, duke deklaruar se SHBA-ja dhe Kanadaja ishin pranë një marrëveshjeje.
Megjithatë, Carney tha se, pavarësisht “përparimit të rëndësishëm”, negociatat nuk kishin arritur objektivat e Kanadasë. Nga ana tjetër, përfaqësuesi amerikan i Tregtisë, Jamieson Greer, akuzoi Otavën se kishte refuzuar të finalizonte marrëveshjen sipas kushteve të dakordësuara më herët.
Sipas propozimeve të diskutuara, SHBA-ja do të ulte tarifat për çelikun dhe aluminin kanadez nga 50% në 25%, ndërsa tarifat për automjetet kanadeze do të zbrisnin nga 25% në 15%. Në këmbim, Kanadaja pritej të merrte disa masa për rritjen e aksesit të produkteve amerikane në tregun e saj.
Me dështimin e negociatave, tarifat e reja amerikane prej 50% do të prekin një gamë të gjerë produktesh kanadeze, përfshirë verën, produktet e qumështit, çimenton, veshmbathjet dhe pajisjet e hokejit. Ato do t’u shtohen tarifave ekzistuese ndaj çelikut, aluminit, automjeteve dhe drurit kanadez.
Tensionet tregtare mes dy vendeve janë përshkallëzuar që prej rikthimit të Trump në Shtëpinë e Bardhë, duke vënë në pikëpyetje marrëdhëniet tregtare mes dy partnerëve kryesorë ekonomikë. Bizneset dhe grupet e interesit në të dyja anët e kufirit kanë paralajmëruar se tarifat mund të rrisin kostot, të ndërpresin zinxhirët e furnizimit dhe të dëmtojnë ekonomitë e të dyja vendeve.
Ndërkohë, Kanadaja pritet të përgjigjet me tarifa hakmarrëse ndaj produkteve amerikane. Përfaqësuesi amerikan i Tregtisë, Jamieson Greer, ka paralajmëruar se Uashingtoni nuk do të tolerojë kundër-tarifat dhe se SHBA-ja do të ndërmarrë masa nëse Otava vijon me planin e saj.
/vizionplus.tv
