Policia polake ka arrestuar një 23-vjeçar nga rajoni i Lublinit, i dyshuar se ka bërë thirrje për vrasjen e politikanëve të lartë të vendit dhe se po përgatitej për një atentat terrorist.
Sipas Byrosë Qendrore për Luftimin e Krimit Kibernetik, autoritetet zbuluan një postim në internet, të publikuar në një grup të dedikuar armëve të zjarrit, ku bëhej thirrje për “eliminimin” e disa personave dhe propozohej organizimi i një atentati ndaj politikanëve të njohur.
Prokurori Mariusz Boron tha për mediat se autori i një postimi në Telegram dyshohet se po përgatitej për një sulm terrorist ndaj politikanëve kryesorë të vendit. Sipas tij, personat e dyshuar si objektiva i përkisnin dy partive më të mëdha politike në Poloni. Autoritetet nuk kanë bërë publike identitetet e politikanëve të cilët dyshohet se ishin shënjestruar.
I riu është akuzuar për vepra të rënda penale, përfshirë nxitjen publike për kryerjen e një krimi. Gjykata ka vendosur masën e arrestit për 30 ditë, ndërsa nëse shpallet fajtor, ai përballet me një dënim deri në 20 vite burg.
/vizionplus.tv
