Avionët amerikanë janë vendosur pranë bregut lindor të Koresë së Veriut për të demonstruar forcën ushtarake por edhe per te qene gati të mposhtin çdo kërcënim. Pentagoni tha se një mision me avionë bombardues janë nisur nga Guami, krahas atyre luftarakë F-15 të nisur nga Okinava e Japonisë në hapësirën ajrore ndërkombëtare mbi oqean.
Sipas zyrtarëve asnjë avion luftarak, apo bombardues amerikan, nuk ka fluturuar ndonjëherë me pare në atë territor. Përmes një komunikate për shtyp, Pentagoni tha se demonstrimi i forcës thekson seriozitetin me të cilin SHBA konsideron sjelljen e papërgjegjshme të Koresë së Veriut, duke e quajtur programin e armëve të vendit komunist një kërcënim të rëndë.
Sipas Pentagonit, presidenti amerikan ka opsione të shumta ushtarake për të eliminuar çdo kërcënim. Fluturimi i avionëve vjen pas informacioneve për një tërmet në Korenë e Veriut që nga shumë u trajtua si një tjetër test bërthamor i radhës nga regjimi i Penianit. Presidenti Donald Trump ka paralajmëruar se do ta shkatërrojë plotësisht vendin komunist, nëse Shtetet e Bashkuara ose aleatet do te prekeshin nga kërcënimi koreano-verior.
