Pas përfundimit të mbledhjes së përbashkët të qeverisë dhe grupit parlamentar të Partisë Socialiste, kryetari i PS-së dhe kryeministri Edi Rama u bëri thirrje socialistëve të ndërtojnë një raport të ri me qytetarët, të bazuar te dëgjimi, transparenca dhe empatia.
Në fjalën e tij, Rama tha se qeveria nuk është në konflikt me qytetarët që kërkojnë më shumë, por duhet ta shohë kritikën si një instrument për përmirësim.
“Ne nuk kemi asnjë luftë për të bërë me flamingot. Beteja sot nuk është mes qeverisë dhe qytetarit që kërkon më shumë. Aleanca që na duhet nuk është një aleancë që ne të heshtim kritikën, por një aleancë për të mbrojtur kritikën”, tha Rama.
Kryeministri theksoi se Shqipërisë nuk i duhen qytetarë që i besojnë qeverisë “me sy mbyllur”, por qytetarë që e vlerësojnë dhe e gjykojnë punën e saj “me sy hapur”.
Rama e lidhi këtë qasje edhe me objektivin strategjik të anëtarësimit në Bashkimin Evropian deri në vitin 2030, duke theksuar se integrimi nuk është thjesht një arritje politike, por një transformim i mënyrës së jetesës dhe funksionimit të shtetit.
Sipas tij, sfida kryesore është që qytetarët ta ndiejnë veten pjesë të këtij procesi. Ai tha se qeveria duhet të komunikojë më qartë për investimet që ndërmerren në emër të interesit publik, duke shpjeguar përfitimet ekonomike, ndikimin në mjedis, mbrojtjen e pronës dhe mënyrën se si shpërndahen përfitimet.
“Ne nuk kemi, po Shqipërisë as nuk i duhen qytetarë që të na besojnë ne me sy mbyllur. Ne kemi nevojë për qytetarë që na masin me sy hapur. Më lejo ta mbyll me dy pyetje; ku po shkon Shqipëria me këtë zhvillim dhe ku jam unë, njeriu i zakonshëm në rrugën e këtij zhvillimi? Përgjigjen e pyetjes së parë do ta jap hap pas hapi, puna e pandalshme për Shqipërinë 2030 në BE, nuk është një pikë e shtuar në hartën e Evropës së bashkuar, por një mënyrë jetese që sapo ka nisur të marrë formë. Ndërsa përgjigjen e pyetjes së dytë, pra ku jam unë, njeriu i zakonshëm në rrugën e këtij zhvillimi, do ta kërkojmë bashkë me njerëzit duke nisur nga kjo metodë, besa, ku qytetari nuk është spekator i zhvillimit as pengesë e tij, por është bashkëudhëtar dhe gjykatës njëkohësisht. Kur një investim pretendohet që i shërben interesit publik, duhet të kuptojmë çfarë të ardhura sjell, çfarë garanton për natyrën, pronën dhe në fund si ndahet fitimi, jo vetëm duhet ta bëjmë këtë, por duhet ta bëjmë me empati. Zhvillimi nuk bëhet mbi apo rreth qytetarit, por bëhet bashkë me të dhe për të. Kjo është ajo që na nxjerr jo vetëm te faktet, por tek empatia”, përfundoi Rama.
