Flet nëna e autorit të krimit në Roskovec: “Problemi ishte vetëm për paratë, vajzën e donim”
Prindërit e 35-vjeçarit Refit Buzit, autorit të ngjarjes së rëndë të ndodhur sot në Roskovec, kanë folur pas krimit ku humbi jetën ish-vjehrri i tij dhe u plagos ish-vjehrra.
Refit Buzi dyshohet se ka vrarë me armë gjahu ish-vjehrrin e tij, Kosta Plakën, 58 vjeç, si dhe ka plagosur ish-vjehrrën, Belere Plakën, rreth 55 vjeçe. Pas ngjarjes, ai ka marrë peng ish-bashkëshorten e tij, të cilën e ka liruar disa orë më vonë.
Nëna e autorit tha se djali i saj dhe ish-bashkëshortja kishin qenë të lidhur për 9 vite dhe se, sipas saj, marrëdhënia mes tyre kishte qenë e mirë.
“9 vjet të fejuar. Ishin në rregull. Vajzën e donim. Vetëm punë lekësh është ajo”, u shpreh ajo.
Sipas prindërve të autorit, konflikti mes palëve lidhej me çështje financiare, konkretisht me paratë e djalit të tyre, të cilat pretendojnë se nuk i ishin kthyer.
“Me krushkun folëm, ai thoshte secili në rehatin e vet. I thash: shkëpute lidhjen nga telefoni. As mos më merr, as mos të marr”, thanë prindërit e 35-vjeçarit.
/vizionplus.tv
