Një gjykatë në Korenë e Jugut ka vendosur që presidenti i gjigantit industrial SK Group, Çoi Tae-won, t’i paguajë ish-bashkëshortes së tij, Ro So-young, 944 miliardë won (rreth 644 milionë dollarë), në një nga çështjet më të mëdha të divorcit në historinë e vendit. Vendimi nuk është ende përfundimtar, pasi pritet të marrë formë të prerë.
Çoi dhe Ro, vajza e ish-presidentit të Koresë së Jugut, Ro Tae-woo, kanë qenë të martuar për 35 vjet. Marrëdhënia e tyre u prish më shumë se një dekadë më parë, pasi u bë publike se biznesmeni kishte një fëmijë me një grua tjetër. Pas vendimit të fundit, avokatët e tij deklaruan se ai shpreh keqardhje për ndikimin publik të procesit dhe se do të reagojë pasi të shqyrtojë arsyetimin e plotë të gjykatës.
Mosmarrëveshja u përqendrua te ndarja e pasurisë së përbashkët. Në vitin 2024, një gjykatë kishte vendosur që Ro të përfitonte 1.38 trilionë won, duke argumentuar se suksesi i Çoi ishte ndihmuar nga mbështetja financiare e ish-presidentit Ro Tae-woo. Megjithatë, Gjykata e Lartë e rrëzoi atë vendim, duke vlerësuar se fondet në fjalë ishin përfituar në mënyrë të paligjshme dhe nuk mund të llogariteshin si pasuri e përbashkët.
SK Group është konglomerati i dytë më i madh familjar në Korenë e Jugut, pas Samsung. I themeluar në vitin 1953 si kompani tekstili, grupi është shtrirë në sektorët e telekomunikacionit, energjisë dhe teknologjisë. Filiali i tij SK Hynix është një nga furnizuesit kryesorë në botë të çipave të memories të përdorur në sistemet e inteligjencës artificiale.
Rritja e kërkesës globale për teknologjitë e inteligjencës artificiale ka ndikuar ndjeshëm në vlerën e kompanisë. Së fundmi, SK Group realizoi edhe një ofertë publike në Nju Jork, duke siguruar 26.5 miliardë dollarë, ndërsa presidenti i Koresë së Jugut, Lee Jae-myung, e përgëzoi publikisht Çoi për kontributin e tij në investimet në fushën e inteligjencës artificiale.
/vizionplus.tv
