Kryeministri Edi Rama vijoi fjalimin e tij para qeverisë, duke u ndalur te mbrojtja e biodiversitetit dhe reagimi i qytetarëve ndaj zhvillimeve të fundit.
Rama tha se Shqipëria ka kaluar një transformim të madh në politikat për florën dhe faunën, duke theksuar zgjerimin e zonave të mbrojtura dhe krijimin e një kuadri të ri ligjor.
Duke folur për protestën e lidhur me mbrojtjen e lagunave dhe simbolin e flamingove, Rama tha se askush nuk do ta kishte imagjinuar një situatë të tillë vite më parë, “në po në të njëjtin bulevard ku protestuesit vriteshin me plumba si shpendët e lagunave”, sipas tij.
Edi Rama:
Në një vend ku vritej statistikisht një njeri në 3 ditë, nuk kishte ndonjë pritshmëri optimiste për jetën e kafshëve.
Në një dekadë, ne kemi bërë për florën dhe faunën e Shqipërisë një përmbysje historike, me rezultate të pamohueshme. Bëmë ligjin e parë për zonat e mbrojtura dhe në këtë dekadë zgjeruam në mënyrë të ndjeshme sipërfaqen e tyre, si asnjë vend tjetër në rajon.
Një parantezë: ndryshimet e vitit 2024 në atë ligj u përdorën papushim nga individë me axhenda politike, përfshirë edhe eurodeputetë që kanë dashur ta besojnë rolin e viktimave të imperializmit amerikan. Ato ndryshime janë bërë në përputhje me direktivën europiane. Nuk është këtu fjala ime kundër fjalës së atyre që mendojnë ndryshe.
Me Komisionin Europian do të skanohen një për një me direktivën e BE-së edhe ato ndryshime. Ky konflikt i stisur do të zgjidhet për bukuri në rrugën e negociatave.
Le të ngrejë dorën një i vetëm në këtë sallë apo jashtë, e të thotë se e kishte imagjinuar, në kohën e sharrave elektrike, se do të vinte një ditë ku, po në të njëjtin bulevard ku protestuesit vriteshin me plumba si shpendët e lagunave, do të zhvillohej një protestë masive për fatin e lagunave të vendit.
Por ja që, nëse do ta shtrëngonim me forcë dikë, t’i thonim “imagjinoje kur do të vijë ajo ditë”, nuk ka shansë të thoshte që kjo ditë do të vinte kaq shpejt.
Për ta mbrojtur zogun dhe lagunën nga unë dhe nga ju, që biodiversitetit i kemi kthyer përkushtimin e ekzekutivit dhe legjislativit me rezultate aspak modeste. Mosmirënjohje? Në asnjë mënyrë jo.
Edhe këtu çelësin na e jep ai që e kuptoi shumë herët: pakënaqësia nuk rritet në një realitet ku njerëzit e kanë humbur shpresën, por aty ku shpresa është rritur më shpejt se realiteti.
Çdo gjë që ende nuk ka ndryshuar ju duket e padurueshme.
Nuk e krahasojnë më Shqipërinë me vendin e mungesave, por me vendin e mundësive ku ata mezi presin të mbërrijnë. Prandaj, nuk na vlerësojnë më. Madje duan ta harrojnë edhe atë që e mbajnë mend akoma.
Një popull që nuk na vlerëson më sa do donim ne, por na kërkon llogari për gjithçka që mbetet për t’u bërë. Një popull që bezdiset kur i tregojmë nga sa poshtë jemi nisur për të ardhur këtu dhe na tregon se sa lart duhet të jemi. Me ne apo pa ne. Dhe ka të drejtë. Pikë.
Kush përpiqet ta zvogëlojë përmasën e kësaj të drejte që na e tregoi Bulevardi i Flamingove, do të zvogëlohet.
Sa më i madh të jesh para kësaj të drejte, aq më në rrezik je. Nëse nuk e kupton se kjo e drejtë është më e madhe dhe më e fortë se ti, qofsh edhe vetë PS, u quajtsh edhe Edi Rama, po deshe.
/vizionplus.tv
