Policia e Tiranës arrestoi dy persona për aktet e dhunës ne protestën e të enjtes në afërsi të Parlamentit. Në pranga ranë Orion Peçi dhe Artemisa Islamaj, të cilët, sipas hetimeve të deritanishme, kanë pasur rol aktiv në goditjen ndaj punonjësve të Policisë.
Sipas burimeve Orion Peçi është identifikuar si personi që ndizte kapsolla me fuqi të lartë, i vendoste në shishe dhe i hidhte në drejtim të efektivëve. Si pasojë e njërit prej këtyre sulmeve, një punonjës i Forcave “Shqiponja” mbeti i plagosur në kokë. Ndërkohë, Artemisa Islamaj dyshohet se siguronte dhe shpërndante kapsollët tek protestuesit e tjerë, të cilët më pas i përdornin kundër forcave të rendit.
Dy të arrestuarit akuzohen për gjashtë vepra penale: Organizimi dhe pjesëmarrja në grumbullime e manifestime të paligjshme; Prishja e rendit dhe qetësisë publike; Kundërshtimi i punonjësit të Policisë; Pengimi i qarkullimit të mjeteve të transportit; Goditja për shkak të detyrës, e kryer në bashkëpunim; Shkelja e rregullave mbi lëndët plasëse, djegëse dhe radioaktive, e kryer në bashkëpunim.
Protesta para Kuvendit nisi rreth orës 9 e vijoi për afro tetë orë. Gjatë gjithë tubimit pati momente të shumta tensioni, ku protestues hodhën vezë, kapsolla dhe sende të forta në drejtim të efektivëve të Policisë, ndërsa forcat e rendit mbajtën të paprekur perimetrin e sigurisë së Parlamentit.
Përplasjet mes protestuesve dhe policisë u përsëritën në disa momente gjatë ditës, duke shkaktuar edhe dëmtimin e disa efektivëve në krye të detyrës.
Në përfundim të veprimeve policore, u shoqëruan gjithsej 32 persona, ndërsa vetëm dy prej tyre u arrestuan.
