Kryeministri Edi Rama ka vijuar fjalimin e tij para socialistëve pas përfundimit të mbledhjes së qeverisë dhe grupit parlamentar të Partisë Socialiste, duke u ndalur te raporti mes arritjeve të qeverisë dhe perceptimit të qytetarëve.
Rama tha se për tre mandate me radhë qeveria ka folur me gjuhën e fakteve, duke përmendur transformimet që sipas tij kanë ndryshuar imazhin e Shqipërisë në arenën ndërkombëtare. Por, sipas kryeministrit, protesta në Bulevardin e Flamingove tregoi një hendek mes fakteve të paraqitura nga qeveria dhe mënyrës se si qytetarët i përjetojnë ndryshimet.
Kryeministri akuzoi gjithashtu për ndërhyrje të huaja dhe manipulime gjatë protestës, duke thënë se video dhe foto të rreme ishin pjesë e saj. Megjithatë, ai theksoi se analiza e këtij fenomeni është e rëndësishme për të kuptuar të gjitha dimensionet e protestës.
Sipas Ramës, ajo që duhet adresuar është hendeku mes pritshmërive të rritura të qytetarëve dhe përvojës së tyre të përditshme me shtetin.
“Tre mandate me radhë ne folëm me gjuhën e fakteve. Faktet janë dhe do të mbeten aty, dëshmitare për ne që e transformuam këtë vend deri këtu, nga një realitet që bënte lajm vetëm për keq, me një shtet në gjunjë që s’kishte as drita dhe me një emër të përbuzuar ndërkombëtarisht. Ne një destinacion të dëshiruar në një flamur të respektuar. Në pasqyrën e bulevardit të flamingove pashë një të vërtetë tronditëse, ne lart kishim faktet, njerëzit poshtë kishin përjetimin. Fakti ynë ishte se investimi i Zvërnecit ëhstë tokë private, përjetimi i tyre është se toka e shtetit po i shitet të huajve. Në atë protestë pati ndërhyrje të huaj, brutale, manipulime, video dhe foto të rreme. Këto janë fakte. Ishin pjesë e rëndësishme e protestës. Analiza e tyre është e rëndësishme për ta kuptuar atë protestë në çdo dimension. Ai manifestim spektakolar e ktheu bulevardin në hendek mes fakteve tona dhe përjetimit të njerëzve. Përgjigjgja për themelin e atij hendeku duhet gjetur te pritshmëritë e rritura të njerëzve dhe konflikti i tyre me përvojën e përditshme“, tha Rama.
Ai shtoi se besimi i qytetarëve nuk mund të rikthehet vetëm duke u mbështetur te faktet apo te rezultatet e arritura, por përmes një ndryshimi të ndjeshëm në mënyrën se si njerëzit e përjetojnë marrëdhënien me shtetin.
Rama tha se hendeku mes fakteve dhe perceptimit duhet të mbyllet duke rikthyer bindjen e qytetarëve se pritshmëritë e tyre mund të realizohen.
“Njerëzit presin çdo ditë dhe më shumë. Ai endek u hap për t’u mbyllur. Mbyllja e tij nuk bëhet duke bërë sikur ai u mbyll vetë. Bulevardi u zbraz nga flamingot dhe aty mebtën vetëm puplat e ditëzinjve, as duke u kapur fort pas fakteve, as duke bërë thjesht ca lëvizje njerëzish dhe duke bindur veten se populli do të bindet kur të shohë veprën, aty ku sot ai shikon atdheun e nxjerrë në shitje. Asnjë nga këto nuk mjafton për ta mbyllur atë hendek. Për ta kuptuar deri në fund atë hendek harrojini faktet tona. Kur midis faktit dhe përjetimit të njeriut të zakonshëm hapet një hendek i tillë, atë e ka hapur rënia e besimit se pritshmëritë e tij do realizohen”, tha Rama.
