Kryeministri Edi Rama është ndalur te fitorja e Partisë Socialiste me 83 mandate, duke e cilësuar atë njëkohësisht si një bekim dhe një mallkim për qeverinë e tij. Në fjalimin para mbledhjes së përbashkët të qeverisë dhe grupit parlamentar socialist, Rama tha se mbështetja e madhe e qytetarëve sjell edhe një përgjegjësi më të madhe përballë pritshmërive të tyre.
Sipas Ramës, fitorja i ka dhënë mazhorancës forcën për të vijuar transformimet, por njëkohësisht ka bërë që qytetarët ta shohin qeverinë si përgjegjëse për çdo problem që hasin.
Rama: Pas fitores së madhe që na dhatë 83 mandate, e kam thënë në disa takime të brendshme, ajo fitore është bekim dhe mallkim. Bekim sepse na dha forcën për të vijuar transformimin, mallkim jo vetëm sepse pas atij besimi shqiptarët e shohin te ne shkakun e çdo gjëje që nuk shkon, por sepse fitoret e mëdha e kthejnë në mbipeshë të përjetuar keq çdo përplasje mes realitetit dhe pritshmërisë së qytetarit. Ne jo vetëm nuk kemi të drejtë të ankohemi pse po gjykohemi kështu, por duhet të pranojmë edhe atë që dhemb më shumë, faktet tona shpesh nuk dëgjohen edhe pse përjetohen si arrogancë. Jo se janë të rreme, as vetëm sepse vijnë pa dëgjim, por sepse dhe kur jepen jepen pa empati.
Në vijim të fjalës së tij, Rama përdori figurën e flamingove dhe sorrave për të ndarë atë që ai e cilësoi si kërkesën qytetare për llogaridhënie nga sulmet politike dhe mediatike.
Rama: Flamingot janë revolta e brendshme paqësore e qytetarit, sorrat janë balta e pështirë e sharlatanit. Flamingot janë kërkesa legjitime e llogarisë qytetare, korbat janë jargët e urrejtjes ekstremiste. Flamingot janë njerëzit e punës, krijimtarisë që kërkojnë më shumë nga ky vend. Sorrat dhe korbat janë dështakë zemërakët mediatik dhe politikë. Njerëzit e mllefeve që nuk duan të ndërtojnë asgjë, por vetëm që gjithçka të rrëzohet. Flamingot na treguan plagën që ta mbyllim ne, sorrat dhe korbat e kruajnë plagën që ta mbajnë sa më gjatë hapur. Flamingt kërkojnë provën e empatisë tonë, korbat kërkojnë gjak nga çdo provë e punës dhe mundit tonë.
Kryeministri theksoi se mesazhi që duhet të marrë qeveria nga kjo protestë është nevoja për më shumë dëgjim dhe empati ndaj qytetarëve, përtej bilancit të reformave dhe rezultateve të arritura.
