Gazetari Mentor Kikia ka analizuar mbrëmjen e sotme në Quo Vadis të moderatores Pranvera Borakaj në Vizion Plus nismën e Gjykatës së Lartë për masën “arrest me burg” për akuzën e shpërdorimit të detyrës.
Kikia tha se nëse do t’i hiqet sanksionimi me arrest veprës së shpërdorimit të detyrës, nuk lehtësohet qytetari, por i korruptuari.
Sipas tij, shpërdorimi i detyrës është paradhoma e korrupsionit.
Pjesë nga biseda:
Borakaj: Pse reagoi në këtë moment kryetari i Gjykatës së Lartë?
Kikia: Ajo që duhet të ndodhë është që për çështje kaq të rëndësishme, edhe pse vendimet gjyqësore nuk komentohen, duhet të ketë vendimmarrje më përtej, një diskutim më të gjerë. Nuk bëhet fjalë vetëm për të lehtësuar një vepër penale, siç ndodhi dikur kur mbusheshin burgjet me gra për kanabis dhe kishte lëvizje për të lehtësuar situatën e tyre, por nuk është ky rasti. Shpërdorimi i detyrës është paradhoma e korrupsionit. Treçereku i tyre janë në burg për shpërdorim detyre, pasi korrupsioni është një vepër e vështirë për t’u provuar. Për shpërdorim detyre janë të gjithë në burg. Nëse heq sanksionimin e arrestit për shpërdorim detyre, i ke dhënë një mjet lehtësues jo qytetarit, jo sistemit të drejtësisë, por një mjet më shumë korrupsionit. Ne jemi pikërisht në fazën kur korrupsioni duhet të goditet edhe më fort, pasi lufta kundër korrupsionit është një nga kriteret e Bashkimit Europian.
