Kryeinspektori i Përgjithshëm i Shqipërisë Dashnor Sula është ndalur këtë të mërkurë në Dibër ku zhvilloi një takim me të gjitha inspektoriatet që janë në këtë zonë. Në një intervistë për mediat, Sula tha se u kërkua angazhim maksimal në plotësimin e detyrave dhe rritjen e efiçencës së punës së përditshme nga të gjitha inspektoriatet. Duke qenë se jemi në sezon turistik, kryeinspektori Sula tha se AKU-s i është kërkuar më shumë të jetë prezente në terren në kontrollin e subjekteve që ofrojnë shërbimin e turizmit.
“Do duhet që të tregojnë dhe të kenë një standard të lartë për sa i përket inspektimit që do të realizohet gjatë kësaj periudhe. Është shumë e domosdoshme përgjatë kësaj periudhe që AKU të jetë e kujdeshme sidomos në punishte artizanale dhe restorante që të mos na ndodhë asnjë rast helmimi apo problematika të tjera që mund të jenë shqetësuese”, tha Sula.
Sa i përket personave të punësuar në subjekte të ndryshme kryesisht në sektorin minerar, kryeinspektori Dashnor Sula tha se ky vit ka patur më pak aksidente në punë, ndërsa inspektoriati i punës duhet të ushtrojë më shumë kontrolle sa i përket zbatimit të rregullave të sigurimit teknik.
“Fatmirësisht gjatë vitit 2026 nuk kemi aksidente me pasojë fatale, humbje jete të minatorëve në Bulqizë. Në vitin 2025 kemi pasur 8 humbje jete, aksidente me pasoja të rënda në miniera dhe 20 aksidente të tjera me plagosje. Përgjatë vitit 2026 kam kërkuar nga Inspektoriati i Punës që të rrisë kontrollin dhe të ketë aktivitet në mënyrë që të parandalohen aksidentet në miniera”, tha Sula.
Lidhur me protestën e cila po zhvillohet në shesh për më shumë se 45 ditë, kryeinspektori Dashnor Sula tha se ajo është legjitime, por nuk e komentoi më tej për shkak të pozicionit që mban në administratën publike.
“E kam hequr kostumin e politikanit. Protestat janë demokratike, të shëndetshme për demokracinë, fakti që s’ka pasur asnjë incident tregon që niveli i demokracisë është në rritje çdo ditë”, përfundoi Sula.
