Zbatimi i amnistisë penale ka sjellë lirimin e 104 të dënuarve nga Institucioni i Ekzekutimit të Vendimeve Penale (IEVP) Fier, ndërsa 210 të tjerë kanë përfituar ulje të dënimit.
Mes të liruarve ishte edhe një i dënuar nga Tepelena, i cili, pasi la qelinë, u shpreh se e sheh të vështirë jetesën pas daljes nga burgu.
“Ndoshta mund të rikthehem prapë. Në Shqipëri nuk mund të jetosh pa shkelur ligjin. Nuk jetohet pa përkrahje. Njeriu nuk mund të mësohet të mos mbijetojë. Jemi njerëz të Zotit, pastaj jemi të ligjit. Unë jam shofer me zanat që nga viti 1978“, tha ai.
I pyetur për arsyen e dënimit, ai u përgjigj shkurt se kishte shkelur ligjin. Burri kishte vuajtur tre vite burg dhe përfitoi dy muaj ulje dënimi nga amnistia penale.
Amnistia penale ka nisur të zbatohet në të gjithë vendin, duke sjellë lirimin e një pjese të të dënuarve që plotësojnë kriteret ligjore, si dhe ulje të dënimit për qindra të tjerë.
/vizionplus.tv
