Situata me zjarret në Pukë, veçanërisht në zonën Gojan-Gjegjan, paraqitet më e qetë, ndonëse disa vatra vijojnë të jenë aktive. Prefektja e Qarkut Shkodër, Holta Duda, tha për Vizion Plus se forcat operacionale po vijojnë punën për izolimin dhe shuarjen e vatrave.
Sipas Dudës, vatra në Gojan të Madh është izoluar dhe rreziku për banesat pranë zonës së përfshirë nga zjarri është eliminuar. Aktualisht ndërhyrja po vijon me forca tokësore.
Duda: Sot situata është më e qetë. Vatrat vazhdojnë të jenë aktive. Vatra më problematike ajo në Gojan të Madh, u izolua dhe rreziku për banesat që ishin afër vatrës u eliminua. Po punohet me forca tokësore aktualisht.
Më problematike paraqitet situata në Gojan të Vogël, ku zjarri ka avancuar në drejtim të zonës së banuar. Për shkak të terrenit të vështirë, ndërhyrja po realizohet nga ajri me dy helikopterë, e kombinuar me operacionin nga toka.
Duda: Ndërkohë në Gojan të Vogël, vatra e cila ka avancuar drejt zonës së banuar, po punohet nga ajri me dy helikopetrë dhe e kombiniuar me ndërhyrje nga toka. Vatra që ishte prezente në Gjegjan është izoluar dhe rrezikshmëria për zonat e banuara është e ulur.
Duda bëri të ditur se në të gjithë qarkun janë shfaqur edhe vatra sporadike, por ato janë evidentuar dhe izoluar në kohë.
Një tjetër vatër aktive ndodhet në Gjorm, në Malësinë e Madhe, në një zonë të thellë malore. Sipas prefektes, ajo po monitorohet në mënyrë të vazhdueshme për të parandaluar përparimin e flakëve drejt zonave të banuara. Deri tani, banesat nuk paraqiten në rrezik.
Duda: Ka pasur vatra zjarri sporadike në të gjithë qarkun, por të kapura në kohën e duhur, janë izoluar. E vetmja vatër aktive e cila është në një zonë malore të thellë në Gjorm, në Malësinë e Madhe, po monitorohet. Do të vijojë monitorimi që të mos avancojë drejt zonave të banuara. Deri më tani nuk rrezikohen banesat.
Sa i përket shkaqeve të zjarreve, Policia e Shtetit ka vijuar praninë në terren gjatë gjithë këtyre ditëve, ndërsa grupi hetimor po heton edhe mundësinë e një zjarrvënieje të qëllimshme.
Prefektja Duda tha se terreni i thepisur dhe vështirësia e zonave malore e bëjnë të komplikuar përcaktimin e shkaqeve, ndërsa deri tani nuk ka një informacion zyrtar për persona të shoqëruar nga policia.
Duda: Policia e Shtetit ka qenë në terren gjatë gjithë këtyre ditëve në mënyrë të pandërprerë. Grupi hetimor ka marrë nën administrim çështjen e një zjarrvënieje të mundshme. Vetë zona malore dhe terreni shumë i vështirë malor e bën shumë të vështirë që të ketë ndodhur në sajë të një pakujdesie. Efektivët po vijojnë hetimet. Nuk kemi një deklaratë zyrtare që mund të ketë persona të shoqëruar.
