Policia e Fierit ka arrestuar në flagrancë një 39-vjeçar, pasi u kap duke ndërtuar pa leje një objekt të destinuar për aktivitet bar-kafe në plazhin e Semanit.
Gjatë kontrolleve në terren, shërbimet e Komisariatit të Policisë Fier konstatuan punimet dhe nga verifikimet rezultoi se shtetasi J. M., banues në fshatin Gjokalli, kishte nisur ndërtimin pa u pajisur me lejen përkatëse nga autoritetet kompetente.
Sipas Policisë, 39-vjeçari dyshohet se kishte punësuar në mënyrë të paligjshme edhe tre persona të tjerë. Për këtë arsye, ai u arrestua për veprat penale “Ndërtim pa leje” dhe “Punësim i paligjshëm”.
Materialet procedurale i janë referuar Prokurorisë së Fierit, ndërsa kontrollet për evidentimin e ndërtimeve pa leje dhe shkeljeve të tjera vijojnë në të gjithë qarkun, veçanërisht gjatë sezonit turistik.
