Kryeministrja e Danimarkës, Mette Frederiksen, deklaroi sot në Tiranë se Ukraina ka shprehur gatishmërinë për të respektuar një armëpushim pa kushte për 30 ditë, si pjesë e përpjekjeve për të çuar përpara bisedimet e paqes me Rusinë. Në një prononcim për media pas samitit, ajo theksoi se Kievi ka qenë shumë i qartë në qëndrimin e tij.
“Ukraina është e përgatitur të respektojë një armëpushim pa kushte për 30 ditë. Sot janë zhvilluar disa bisedime dhe pritet që të ndodhë lirimi i disa pengjeve. Tashmë, topi është në fushën e Rusisë për të treguar nëse është serioze,” tha Frederiksen.
Sipas saj, Ukraina po tregon përmbajtje, edhe pse sulmet nga Rusia nuk janë ndalur, duke e detyruar atë të mbrohet. Ajo shtoi se vendi i saj është i gatshëm të mbështesë Kievin me kapacitete mbrojtëse.
“Ukraina na tha se ndërsa ajo përgatitet për armëpushim, lufta vijon. Dhe pikërisht për këtë arsye, ajo kërkon ndihmën që i nevojitet për t’u mbrojtur. Ne, si Danimarkë, jemi të gatshëm ta ofrojmë këtë ndihmë,” theksoi Frederiksen.
Këto deklarata vijnë në një kohë kur bisedimet ruso-ukrainase janë rikthyer në vëmendje, por mbeten të brishta, në mungesë të angazhimit të qartë nga pala ruse.
/vizionplus.tv
