Kryeministri Edi Rama, njëherësh kreu i Partisë Socialiste, ka zhvilluar pasditen e kësaj të enjteje një takim me drejtuesit politikë të PS-së dhe kryetarët e komisioneve, në kuadër të BESË-s.
Gjatë fjalës së tij, Rama u shpreh se Shqipëria ka dalë nga një periudhë varfërie dhe shpërfilljeje dhe se tashmë ndodhet në një epokë të re, me vlerësimin më të lartë ndërkombëtar që ka pasur ndonjëherë.
Sipas tij, sfida kryesore tani është forcimi i besimit të qytetarëve te shteti dhe institucionet.
Rama shtoi se Partia Socialiste duhet të mbetet në shërbim të qytetarëve dhe të ecë përpara me ide të qarta dhe këmbëngulje, duke theksuar se objektivi është përmbushja e një “misioni historik” për vendin.
Rama: Ne e nxorëm Shqipërinë nga një epokë varfërie dhe shpërfilljeje, sot jemi në një epokë tjetër, me një vlerësim ndërkombëtar më të lartë se ndonjëherë. Pikërisht sepse kemi hyrë në këtë epokë ka nisur prova jonë. Fuqizimi i besimit te shteti, qeveria dhe institucionet është prova dhe sprova e pjekurisë së demokracisë.
Prandaj, mandati i katërt nuk mund dhe nuk duhet, dhe ne do të bëjmë çmos që të mos jetë zgjatimi i tre mandateve të mëparshme. Mandati i katërt duhet të jetë një kthesë, sepse për PS-në duhet të jetë mandati i kthesës strategjike drejt njerëzve. Te partia që rri pranë tyre kur njerëzit kërkojnë vëmendjen e saj për t’i treguar se çfarë vendi duan. Nga dëgjimi i njerëzve si mirësjellje, te detyrimi ynë për të qenë atje kur ka nevojë të dëgjohet zëri i tyre. Nga qytetari që kërkon të hapë një derë, te partia që e ndihmon pa i kërkuar votën që t’ia hapë derën.
Të qëndrosh gjatë në pushtet nuk mund të nënkuptojë t’u zësh vendin të rinjve, por t’u hapësh rrugën të rinjve nuk do të thotë t’ia dorëzosh Shqipërinë, por të hapësh partinë, të krijosh hapësirë për ide të reja, të prodhosh drejtues dhe jo vetëm ndjekës. Unë nuk dua që ne të qëndrojmë sa më gjatë në vendin që jemi ulur, por të kryejmë sa më shumë punë. Dua ta ngjizim Shqipërinë në BE, të bëjmë të palëkundshme pavarësinë e drejtësisë dhe institucionet tona të afta të funksionojnë njësoj për të gjithë. T’i japim jetë një marrëdhënieje tjetër mes qytetarit dhe qeverisë, ta vëmë partinë në dispozicion të qytetarit.
Të ecim para me ide të qarta dhe këmbëngulje të madhe deri në ditën kur populli të flasë ndryshe me votën e tij. Detyra jonë është të mos lidhemi me pushtetin, se partitë nuk plaken nga numri i viteve që mbajnë mbi supe. Ne mund ta çojmë jo vetëm këtë mandat me sukses, por PS mund të kërkojë mandate të tjera, vetëm nëse gjatë këtyre mandateve duartrokasim edhe atë që nuk na duartroket. Ne mund të vazhdojmë të bëjmë histori, sepse ka ende për të përmbushur një mision historik.
/vizionplus.tv
