Një zjarr ka rënë sot në një magazinë me materiale plastike dhe piroteknike pranë fabrikës së çimentos në Shkozet.
Menjëherë pas njoftimit, në vendngjarje janë angazhuar forcat zjarrfikëse me 4 mjete dhe 2 autobote nga Durrësi, 1 mjet zjarrfikës dhe 1 autobot nga Shijaku, si dhe 1 mjet zjarrfikës nga Porti i Durrësit. Ekipet po punojnë intensivisht për izolimin dhe shuarjen e flakëve.
Deri tani nuk raportohet për persona të lënduar dhe nuk ka dëme në banesat përreth, ndërsa zjarri mbetet i kufizuar vetëm brenda mjediseve të magazinës.
Për arsye sigurie, OST ka ndërprerë furnizimin me energji elektrike, pasi objekti i përfshirë nga flakët ndodhet poshtë linjës së transmetimit. Si pasojë, nënstacioni i Shkozetit është aktualisht jashtë funksionit.
Për shkak të këtij zjarri është krijuar trafik I rënduar në unazën e Shkozetit me drejtim autostradën Durres-Tiranë.
