Një pushim familjar në Spanjë u kthye në një makth për një 29-vjeçare nga Britania, pasi nxirja e pazakontë e lëkurës rezultoi të ishte shenjë e një sëmundjeje të rrallë dhe potencialisht vdekjeprurëse.
Poppy Guy udhëtoi drejt Malagës, por pas pushimeve, ajo vuri re se lëkura e saj po errësohej në mënyrë të pazakontë, deri në një ngjyrë shumë të theksuar kafe të errët.
“Barku im ishte gati i zi. Të gjithë pyesnin pse isha bërë kaq e errët”, tregoi ajo.
Por ndryshimi i ngjyrës së lëkurës shoqërohej edhe me simptoma të tjera shqetësuese. Poppy vuante nga të vjella të përditshme, marramendje, dobësi ekstreme dhe vështirësi në frymëmarrje. Ajo kishte kërkuar ndihmë mjekësore disa herë, por sipas saj, simptomat i ishin atribuar ankthit.
E shqetësuar, nëna e dy fëmijëve përdori inteligjencën artificiale për të kërkuar shpjegime për gjendjen e saj. ChatGPT i sugjeroi si një mundësi sëmundjen e Addison-it, një çrregullim i rrallë ku gjëndrat mbiveshkore nuk prodhojnë mjaftueshëm hormone.
Pasi i përmendi mjekut dyshimin për këtë sëmundje, ajo u dërgua për ekzaminime urgjente në spital. Një javë më vonë, Poppy u rrëzua në shtëpi dhe u transportua me urgjencë në spital, ku mjekët zbuluan se kishte pësuar një krizë mbiveshkore, një komplikacion i rëndë që mund të jetë fatal.
“Mjeku më tha se nëse nuk do të kisha shkuar në spital atë ditë, ndoshta nuk do të isha gjallë”, rrëfeu ajo.
Pas diagnozës, Poppy nisi trajtimin me medikamente dhe aktualisht merr 11 tableta në ditë. Ajo po kryen edhe fizioterapi, pasi sëmundja e ka lënë përkohësisht me vështirësi në ecje.
Sëmundja e Addison-it shkakton shpesh lodhje, errësim të lëkurës, humbje peshe, dhimbje barku, marramendje dhe dobësi të muskujve. Një nga komplikacionet më të rënda është kriza mbiveshkore, e cila kërkon trajtim të menjëhershëm.
/vizionplus.tv
