Në një takim me drejtuesit politikë të PS-së dhe kryetarët e komisioneve, kryeministri Edi Rama deklaroi se Shqipëria ndodhet në një provë të vështirë, por reale, pranë futjes në BE.
Ai tha se, sikur dera e Europës të mos ishte kaq pranë dhe kaq reale, do të ishte tërhequr nga politika pas 3 mandatesh, pasi misioni mund të quhej i përmbushur.
“Nëse dera e BE-së nuk do të ishte kaq pranë, do të isha tërhequr shumë më herët, pas 12 vjetësh. Sepse Shqipëria, pas atyre 12 viteve të Partisë Socialiste në drejtim, me punët e panumërta transformuese dhe përtej gjithë gabimeve dhe të metave, u bë një Shqipëri tjetër nga ajo që morëm në kurriz kur e gjetëm buzë greminës, saqë pa këtë orën e historisë në dyert e Europës mund të quhej me kokën lart mision i përmbushur.
Por pikërisht pas gjithë asaj përpjekjeje dhe pune kolosale, dhe dera e Europës është hapur realisht, mandati i katërt ishte zgjedhja logjike. Deri ditën e fundit të këtij mandati të katërt, e gjithë partia jonë duhet të nxjerrë gjithçka nga vetja për Shqipërinë dhe shqiptarët.
Nëse mandati i vitit 2025 shpjegon pse jemi këtu deri në 2029, nuk shpjegon pse kjo parti duhet të synojë drejtimin deri më tutje.
Këtu vjen përgjigjja: Pse duhet të qëndrojmë në krye? Jo pse hë për hë vetëm ne mundemi të udhëheqim Shqipërinë, jo sepse nesër do të jetë kështu bashkë me të tjerët, as pse kundërshtarët tanë janë të vjetër edhe kur janë të rinj, as pse jemi vetëlidhur pas karriges për hir të pushtetit.
Përgjigjja e vërtetë ka të bëjë me orën ku ndodhet Shqipëria. Shqipëria nuk është sot ende një vend në një rrugë të zakonshme që mund të ecë, mund të ndalojë, të ndërrojë qeverinë, ta vazhdojë ku e la, sikur të mos kishte orën që ka sot dhe historia të mos ishte një tren që rri në stacion.
Demokracitë e vjetra mund të rrinë, pasi i kanë institucionet e kolauduara me breza të tërë, e kanë administratën me shekuj të kolauduar dhe, kur ecin në rrugën e shtruar të shtetit, e ndërrojnë shoferin edhe 7 herë në 10 vjet, por nuk e kthejnë shtetin nga rruga.
Ose si Belgjika, që ndenji 2 vjet pa qeveri se nuk bëhej koalicioni, por shteti funksionoi”, u shpreh Rama.
