Gjykata e Apelit ka lënë në fuqi vendimin për dënimin me 16 vite burg të Mario Përlleshajt, i cili vrau me thikë bashkëmoshatarin e tij, Martin Cani.
Apeli rrëzoi kërkesën e mbrojtjes për ndryshimin e vendimit, e cila kishte pretenduar se ngjarja kishte ndodhur në kushtet e vetëmbrojtjes dhe tronditjes së fortë psikike.
Përlleshaj u shpall fajtor për vrasjen e Martin Canit dhe tentativën e vrasjes ndaj Luis Meçes, i cili mbeti i plagosur. Vendimi prej 16 vitesh burg, i dhënë më herët nga Gjykata e Tiranës, mbetet kështu në fuqi.
Ngjarja e rëndë ndodhi më 18 nëntor 2024 pranë shkollës “Fan Noli” në Tiranë, pas një konflikti mes disa adoleshentësh ku humbi jetën 14-vjeçari Martin Cani.
