Pastrimi i parave në Shqipëri po kthehet në një fenomen gjithnjë e më shqetësues, një situatë e pranuar edhe nga drejtuesi i SPAK, Klodian Braho, gjatë raportimit në Komisionin e Ligjeve. Sipas tij, lufta kundër këtij fenomeni është kthyer në një prioritet për Prokurorinë e Posaçme.
“Për sa i përket pastrimit të parave, është një shqetësim për ne. Treguesit që kemi janë tregues të një niveli të lartë rreziku dhe ne e kemi vlerësuar si një çështje prioritare. Hetimet e fundit tregojnë një ndryshim në qasje dhe ne ndajmë të njëjtin mendim se këto fenomene dëmtojnë ekonominë tonë dhe rrisin fuqinë financiare të krimit të organizuar. Është një veçori që mbetet prioritare për ne”, tha drejtuesi i SPAK, Klodian Braho.
I pyetur nga deputetët e opozitës në lidhje me krimin zgjedhor, Braho u shpreh se edhe ky është një fenomen shqetësues, ndërsa theksoi se nuk ka standard të dyfishtë në hetimet e SPAK.
“Për sa i përket krimit zgjedhor, kemi pasur një diskutim të veçantë, ku dhamë paraqitjet tona në lidhje me shqetësimet që kemi. Krimi zgjedhor është një fenomen shqetësues dhe nuk pajtohemi me këtë situatë. Nuk është krijuar brenda një viti, por është një problem i shtrirë në një kohë të gjatë. Ajo që duhet të kuptojmë është se çështjet përfundojnë në akuza vetëm kur ekzistojnë prova. Nuk ka ndonjë standard të dyfishtë. Mendoj se është një perceptim, por nga ana jonë nuk nisemi nga perceptimet, por nga dosjet.”
Kryeprokurori nuk pranoi të komentojë çështjet që lidhen me figura të politikës dhe deputetë të Kuvendit të Shqipërisë, duke theksuar se dosjet janë ende nën hetim.
/vizionplus.tv
