E rëndë në Japoni, rrëzohet karroca gjatë festivalit, humbin jetën dy persona

Dy persona humbën jetën dhe 16 të tjerë u plagosën në dy aksidente të rënda të ndodhura gjatë festivaleve tradicionale Danjiri në prefekturën e Osakës.

Sipas gazetës japoneze Asahi Shimbun, ngjarjet ndodhën në qytetet Izumisano dhe Izumiotsu, kur karroca të mëdha prej druri u përmbysën gjatë manovrave në rrugë.

Të dy viktimat, përkatësisht 51 dhe 48 vjeç, ishin pjesëmarrës aktivë në festival dhe mbanin rolin e njohur si “takari”, duke u përpjekur të ruanin ekuilibrin e strukturave të rënda gjatë kthesave. Ata u shtypën nga karrocat pas humbjes së ekuilibrit të tyre.

Aksidenti i parë ndodhi rreth orës 11:00 me orën lokale në qytetin Izumisano. Sipas autoriteteve, një karrocë u përmbys në kryqëzimin Nagataki, duke zënë poshtë disa persona. Ekipet e shpëtimit nxorën një 51-vjeçar nga poshtë strukturës dhe e transportuan në spital, ku ai u shpall i vdekur.

Shtatë persona të tjerë, të moshës nga 10 deri në 59 vjeç, u dërguan në spital, dy prej tyre me lëndime të rënda.

Rreth dy orë më vonë, një tjetër aksident me pasoja fatale u regjistrua në qytetin Izumiotsu. Në orën 13:20, shërbimet lokale të emergjencës morën një telefonatë për përmbysjen e një karroce në kryqëzimin Miyamachi.

Një punëtor fabrike 48-vjeçar, nga qyteti Izumi, u shtyp nga struktura prej druri dhe humbi jetën. Nëntë persona të tjerë u dërguan në spital me lëndime që, sipas autoriteteve, nuk rrezikonin jetën.