Ish-ministri i Shëndetësisë, Tritan Shehu deklaroi këtë të hënë se kryeministri Edi Rama po vë në rrezik lëvizjen e lirë të shqiptarëve në Evropë me keqmenaxhimin e pandemisë.
Nëpërmjet një postimi në “Facebook”, demokrati tha se kjo ndodh pasi autoritetet tona nuk kryejnë dot testime masive.
“Rama po na rrezikon jo vetëm shëndetin, por edhe “lëvizjen e lirë”! Lajm i mirë që Komisioni Europian ka kërkuar të hyjë në fuqi regjimi i “lëvizjes së lirë” për Ballkanin Perëndimor në zonën Shengen, duke respektuar rregullat anti-COVID-19 të pritësit. Por fatkeqësisht shqiptarëve së bashku me shëndetin po u rrezikohet dhe kjo “lëvizje”: Se për ne është e pamundur të realizojmë individualisht testimet Covid, virusale e imunologjike, kusht ky nga disa vende të zonës Shengen. Siç e kemi thënë ndalimi i laboratorëve tek ne për të kryer këto testime, kur ato tashmë janë të thjeshta, të shpejta, me kosto të ulët (veçanërisht imunologjiket), përbën një veprim jo vetëm anti shkencor që ul numrin e tyre, që deformon të dhënat me pasoja negative në përballjen e epidemisë e shëndetin e qytetarëve, por që po bëhet edhe një pengesë serioze për lëvizjen jashtë vendit.”
Sipas Tritan Shehut, rastet ditët e fundit janë rritur shumë pasi qeveria e keqmenaxhoi mbylljen.
