Kryeministri Edi Rama ka mbledhur kryetarët e bashkive të vendit në një prej lokaleve përgjatë aksit rrugor Kuç–Qeparo, në jug të vendit. Takimi zhvillohet në kuadër të diskutimeve për reformën territoriale dhe ndryshimet që mund të prekin organizimin e pushtetit vendor në Shqipëri.
Kryetarët e bashkive kanë mbërritur në ambientet ku do të zhvillohet takimi më herët, ndërsa kryeministri Rama ka mbërritur rreth orës 12:00.
Në momentin e mbërritjes, ai është pritur nga ministrat Arbjan Mazniku dhe Ervin Demo, të cilët janë angazhuar në procesin e diskutimeve për qeverisjen vendore dhe reformën territoriale.
Pritet që në fokus të jenë propozimet për riorganizimin territorial të vendit, mënyra e funksionimit të njësive vendore dhe mundësia e ndryshimit të hartës së bashkive.
Mësohet se në këtë takim marrin pjesë edhe drejtuesit e bashkive që mund të preken drejtpërdrejt nga reforma territoriale.
Pikërisht për këto bashki, diskutimi pritet të jetë veçanërisht i rëndësishëm, pasi çdo ndryshim në hartën territoriale mund të sjellë riorganizim të njësive administrative dhe mënyrës së ofrimit të shërbimeve për qytetarët.
Kjo është një nga mbledhjet ku pritet të diskutohen në nivel politik dhe institucional hapat e mëtejshëm të reformës, ndërsa ende nuk ka detaje të plota mbi propozimet konkrete që do të shqyrtohen.
