Ministri i Brendshëm, Sandër Lleshaj shpjegoi se urdhrin e dëbimit për shtetasin turk Harun Çelik nuk e jep ministri, por është çështje administrative. Sipas tij, qytetari në fjalë është kapur ne korrik të 2019 me një pasaportë turke në të cilën ndodhej një vizë kanadeze e falsifikuar.
Gjatë fjalës së tij në seancën plenare të kësaj të hëne, Lleshaj u shpreh i bindur se shtetasi turk nuk ka qenë asnjëherë rezident në Shqipëri.
“Kjo do të thotë se ky shtetas në kushtet e shkeljes së ligjit është proceduar dhe është dënuar nga gjykata e Tiranës dhe është deklaruar fajtor për falsifikim. AI është dënuar me 13 muaj burgim. Më pas i është ulur dënimi me 1/3 në 8 muaj”, nënvizoi ministri.
Ndër të tjera, Lleshaj qartësoi se dëbimi i qytetarëve të huaj nga Shqipëria që nuk disponojnë dokumente të ligjshme është një praktike e rëndomtë e përditshme.
“Vendimi nuk merret nga ministri i brendshëm, ministri i brendshëm merret me çështje politike. Vendimet e dëbimit janë vendime administrative. Në rastin konkret përgjegjës janë drejtoritë vendore të policisë së kufirit dhe migracionit. Cdo vit dëbohen mijëra qytetarë të huaj që ndodhen në kushte të parregullta ligjore. Ka dy rrugë për dëbim, ose largim vullnetar, ose largim i detyruar. Për vitin 2019 janë larguar vullnetarisht 3445 qytetarë të huaj që kanë qenë në kushte të parregullta ligjore në Shqipëri. Janë larguar me detyrim 45 qytetarë të huaj. Ka me mijëra qytetarë të huaj që dëbohen nga vende të BE drejt Shqipërisë.”
Mësuesi turk është pjesë e lëvizjes “Gulen” apo e quajtur ndryshe “FETO” të udhëhequr nga Fethullah Gylen, i cili akuzohet nga presidenti i Turqisë, Rexhep Tayyip Erdogan si ideator dhe organizator i grushtit të dështuar të shtetit në Turqi të vitit 2016.
