Përplasje në Kuvend, Redi Muçi sulmon qeverinë, Balla i përgjigjet: “Vazhdoj të të quaj një sorrë”
Deputeti i Lëvizjes “Bashkë”, Redi Muçi, ka mbajtur një fjalim me tone të ashpra në Kuvend, ku ka akuzuar qeverinë për përpjekje për të shtypur kundërshtimin qytetar dhe për mënyrën se si po menaxhon protestat e fundit. Duke iu referuar zhvillimeve politike dhe sociale, Muçi deklaroi se vendi po përballet me një përplasje mes politikës së vjetër dhe një brezi të ri qytetarësh, të cilët sipas tij janë më të organizuar dhe përdorin më mirë rrjetet sociale.
“Nuk ma merrte mendja se do të vinte kjo ditë, në mes të protestave, të Botërorit, të Kanye West-it, të Ramës dhe Ballës, që numëron me dylbi protestuesit, siç bënte dikur me foltoren e Berishës”, u shpreh Muçi nga foltorja e Kuvendit.
Ai vijoi duke thënë se protestat nuk janë një proces i shkurtër, por një përballje afatgjatë. “Dita e djeshme, e 50-ta, tregoi se kjo nuk është sprint, por maratonë e qartë. Falë saj do të bëjmë të mundur pengimin e planeve djallëzore të Ramës”, deklaroi deputeti.
Muçi paralajmëroi gjithashtu për përshkallëzim të protestave në rast se, sipas tij, do të ndërmerren masa kufizuese ndaj qytetarëve. “Nëse gjatë gushtit do të rrethoni dhe shtrini tela me gjemba në tokat e shqiptarëve, do të përballeni me qytetarët. Nëse rrethoni me tela me gjemba Shqipërinë, protestat do t’ju dalin në ballë, deri sa Rama të dorëhiqet”, tha ai.
Në replikë, kreu i Grupit Parlamentar të Partisë Socialiste, Taulant Balla, iu përgjigj deklaratave të Muçit me tone ironike, duke përdorur një gjuhë të ashpër ndaj deputetit të “Bashkë”.
“Zoti deputet, ta kam thënë dhe në seanca të tjera, vazhdoj të të quaj një sorrë. Sepse më je dukur si ajo miza te bishti i kalit”, u shpreh Balla.
Ai tha se mazhoranca është e gatshme të dialogojë për shqetësimet e qytetarëve, por theksoi se opozita nuk mund të përcaktojë agjendën parlamentare.
“Ne e kemi thënë shumë qartë që jemi të gatshëm të dialogojmë me flamingot për të gjitha shqetësimet dhe ankesat e tyre, se si duhet ta bëjmë ne detyrën më mirë dhe si duhet të ndalojmë çdo formë abuzimi me detyrën. Ky është dallimi ynë i madh”, deklaroi Balla.
Duke iu referuar nismave ligjore në Kuvend, Balla shtoi: “Sa i përket ligjeve që përmendi zoti Muçi, agjendën parlamentare nuk na e bëni dot ju. Kur të bëheni shumicë parlamentare, na e bëni ju agjendën. Ne po punojmë për një ligj të ri për investimet strategjike.”
/vizionplus.tv
