Policia e Vlorës ka finalizuar tre operacione të ndryshme brenda 24 orëve, duke goditur raste të armëmbajtjes pa leje, vjedhjes me dhunë dhe transportimit të personave që synonin të kalonin ilegalisht kufirin drejt Greqisë.
Si rezultat i operacioneve janë arrestuar tre persona. Njëri prej tyre u kap teksa lëvizte me taksi dhe mbante armë zjarri pa leje, një tjetër dyshohet se dhunoi një punonjës të OShEE-së dhe i vodhi automjetin e kompanisë, ndërsa personi i tretë transportonte pesë shtetas që kishin pengesa për lëvizjen në zonën “Schengen”.
Në kuadër të operacionit “Pasagjeri”, shërbimet e Stacionit të Policisë Dhërmi, në bashkëpunim me Forcën e Posaçme “Shqiponja”, arrestuan në flagrancë 26-vjeçarin D. M., banues në Babrru, Tiranë. Gjatë kontrollit të taksisë me të cilën udhëtonte, policia i gjeti një pistoletë me krehër dhe fishekë, të cilën e mbante pa leje.
Ndërkohë, në operacionin “Thirrja”, policia e Delvinës, në bashkëpunim me Komisariatin e Sarandës dhe Forcën Kombëtare të Sigurisë, arrestoi 31-vjeçarin H. Z., banues në fshatin Vanë. Ai dyshohet se kishte dhunuar një punonjës të OShEE-së për t’i marrë automjetin e kompanisë. Gjatë kontrollit, atij iu gjet edhe një armë e ftohtë (thikë).
Operacioni i tretë, i koduar “Barriera”, u finalizua nga shërbimet e Policisë Kufitare Sarandë, pranë pikës kufitare Qafë Botë. Në pranga ra 30-vjeçari M. Q., banues në Belsh, pasi transportonte me një automjet tip “Volkswagen” pesë shtetas, katër nga Shqipëria dhe një nga Kosova, të cilët synonin të kalonin ilegalisht në Greqi për shkak të pengesave për lëvizjen në zonën “Schengen”.
Policia bëri të ditur se gjatë operacioneve u sekuestruan një pistoletë me krehër dhe fishekë, një thikë dhe automjeti i përdorur për transportin e personave. Materialet procedurale i janë referuar prokurorive për veprime të mëtejshme.
/vizionplus.tv
