Dy persona kanë humbur jetën si pasojë e një aksidenti të rëndë rrugor të ndodhur në orët e para të pasdites në komunën e Pastoranos, në Itali. Mes viktimave është edhe një shtetas shqiptar, i identifikuar si Xhevdet Bakushi.
Aksidenti ndodhi përgjatë rrugës shtetërore “Appia”, pranë kryqëzimit me rrugën shtetërore “Casilina” dhe pikës së pagesës së autostradës Capua. Sipas mediave italiane, një automjet që dyshohet se po lëvizte me shpejtësi të lartë u përplas fuqishëm me mjetin ku ndodhej 42-vjeçari shqiptar.
Përplasja ishte e fortë, duke shkaktuar dëmtime të mëdha në automjet. Njëri prej viktimave u përplas disa metra larg mjetit si pasojë e goditjes, ndërsa të dy personat humbën jetën në vendngjarje.
Xhevdet Bakushi, banor i Pignataro Maggiore, ishte punëtor në Itali, i martuar dhe baba i dy fëmijëve të vegjël. Lajmi për vdekjen e tij ka shkaktuar tronditje te familjarët dhe komuniteti ku ai jetonte.
Autoritetet italiane kanë nisur hetimet për të zbardhur dinamikën e plotë të aksidentit dhe për të përcaktuar shkaqet që çuan në përplasjen fatale.
/vizionplus.tv
