Dhjetëra persona rezultojnë ende të zhdukur pasi një traget u fundos në brigjet e Guajanës, në Amerikën e Jugut, mbrëmjen e së shtunës (18 korrik), ndërsa në bord ndodheshin gjithsej 133 persona.
Sipas autoriteteve, deri më tani janë shpëtuar 67 persona, mes tyre 15 fëmijë, ndërsa operacionet e kërkim-shpëtimit vijojnë në përpjekje për të gjetur të mbijetuarit e tjerë.
Mediat lokale raportojnë se një kullë e kontrollit të trafikut ajror mori një sinjal emergjence në orën 23:01, sipas orës lokale, nga trageti MV Barima, çka çoi në nisjen e menjëhershme të operacionit të kërkim-shpëtimit.
Anija u fundos në Oqeanin Atlantik, ndërsa ishte duke lundruar drejt fshatit Port Kaituma. Autoritetet nuk kanë bërë ende të ditur portin nga i cili ishte nisur trageti dhe as shkaqet e fundosjes.
NEWS Source Update: 67 of the 133 passengers and crew who were on board the MV Barima when it capsized late last night have now been rescued.
Search and Rescue operations are ongoing. pic.twitter.com/ejKMZURKfe
— News Source Guyana (@newssourcegy) July 19, 2026
Kryeministri i Guajanës, Mark Phillips, deklaroi se operacioni i kërkim-shpëtimit do të vazhdojë derisa të jenë shteruar të gjitha mundësitë për gjetjen e personave të zhdukur.
Ndërkohë, ministri i Shërbimit Publik dhe Aviacionit, Deodat Indar, njoftoi se janë ngritur qendra të posaçme për të informuar dhe mbështetur familjet e personave që ndodheshin në bord.
