Aktori turk Burak Çelik ka ndërprerë pushimet në Antalia dhe është kthyer në Stamboll, pasi emri i tij është përfshirë në një hetim më të gjerë që përfshin disa figura të njohura nga bota e artit dhe biznesit në Turqi.
Sipas mediave turke, Çelik ndodhej me familjen në Antalia kur u informua për zhvillimet ligjore. Ai është kthyer në Stamboll mëngjesin e 16 korrikut, i shoqëruar nga familjarët dhe avokati i tij, ndërsa më pas është paraqitur pranë Komandës së Përgjithshme të Xhandarmërisë për procedurat përkatëse.
Aktori është marrë në pyetje në kuadër të një hetimi të koordinuar nga Prokuroria Publike e Bakërkojit. Pas dhënies së deklaratës dhe përfundimit të procedurave, Çelik është lënë i lirë.
Hetimi përfshin gjithsej 25 persona, mes tyre artistë, aktorë, biznesmenë dhe figura të njohura në rrjetet sociale. Sipas raportimeve, çështja lidhet me dyshime për përdorim të substancave narkotike ose stimuluese, lehtësim të përdorimit të tyre dhe sigurim ambientesh për konsum. Autoritetet kanë kryer kontrolle dhe ekzaminime biologjike ndaj personave të përfshirë.
Megjithatë, përfshirja në një hetim apo marrja në pyetje nga autoritetet nuk përbën fajësi penale. Përgjegjësia ligjore përcaktohet vetëm pas përfundimit të procedurave dhe vlerësimit të provave nga organet gjyqësore.
Burak Çelik është një nga emrat e përfshirë në këtë fazë të hetimit, por mediat turke raportojnë se ai nuk është arrestuar dhe nuk ka ndaj tij një vendim përfundimtar penal. Ndërkohë, aktori pritet të rikthehet në ekran me serialin e ri “Haysiyet”, ndërsa në jetën private ai dhe bashkëshortja e tij, Ece Bayrak, janë në pritje të fëmijës së tyre të parë.
View this post on Instagram
/vizionplus.tv
