Karakaçi inspekton Portin e Durrësit: Synojmë të lehtësojmë hyrjen e turistëve dhe emigrantëve

Ministri i Infrastrukturës dhe Energjisë, Enea Karakaçi, zhvilloi një inspektim në Portin e Durrësit për të parë nga afër masat e marra për përballimin e fluksit të sezonit turistik.

Drejtori i Portit të Durrësit, Liburn Aliu, deklaroi se janë marrë të gjitha masat për të përballuar fluksin e udhëtarëve, duke theksuar se ky sezon paraqitet po aq i ngarkuar sa ai i vitit të kaluar.

“Janë marrë masat që të përballohet fluksi. Ky vit është po aq i dendur sa ka qenë viti i kaluar. Janë marrë masa për punën e mirëmbajtjes së terminalit nga brenda. Deri tani, po procesohet gjithçka në mënyrë shumë të shpejtë dhe të rregullt. Me masat që janë marrë, deri tani çdo gjë po shkon mirë”, u shpreh Aliu.

Nga ana e tij, ministri Karakaçi tha se vendi ndodhet në kulmin e sezonit turistik dhe se institucionet përgjegjëse kanë hartuar një plan masash për të garantuar mbarëvajtjen e përpunimit të pasagjerëve.

“Jemi në kulmin e sezonit turistik. Në vitin 2025 në Portin e Durrësit janë përpunuar rreth 800 mijë pasagjerë. Mendojmë se do të kemi të njëjtin numër edhe këtë vit. Është i rëndësishëm zbatimi me përpikmëri i planit të masave që Autoriteti Portual i Durrësit, por edhe Drejtoria e Përgjithshme Detare, kanë marrë, pasi detyra jonë është që ta bëjmë sa më të thjeshtë hyrjen në Shqipëri të turistëve dhe shqiptarëve që vijnë nga larg”, deklaroi Karakaçi.