Ish-presidenti i Republikës, Bamir Topi, ka dëshmuar sot në Gjykatën e Posaçme (GJKKO) në procesin për dosjen “Partizani”, ku të pandehur janë ish-kryeministri Sali Berisha dhe Jamarbër Malltezi.
Gjatë dëshmisë së tij, Topi u shpreh se nuk ka pasur kontakte personale me Malltezin, duke deklaruar se nuk është ulur asnjëherë me të për të pirë kafe. Ai tha se njeh disa prej personave të përmendur në proces për shkak të funksioneve të tyre apo njohjeve familjare, por jo për lidhje të drejtpërdrejta me çështjen.
“Nuk jemi ulur qoftë për të pirë asnjë kafe me Jamarbër Malltezi. Me z. Begeja kemi banuar në lagjen e vjetër me distancë 400-500 metër. E njoh si pjesëtar të një familjeje të madhe në Tiranë. Z. Bektashi e njoh si një politikan të dikurshëm, si një ish-ministër, po nuk na lë memoria. Andia Pustinën nuk e njoh. Ndoshta ngatërrohem për z. Bektashi, por kam përshtypjen se ka qenë ministër gjatë qeverisë “Meksi”“, tha Bamir Topi.
Duke folur për periudhën kur ka mbajtur detyrën e Presidentit të Republikës, nga viti 2007 deri në vitin 2012, Topi tha se si kreu i shtetit ishte edhe komandant i Përgjithshëm i Forcave të Armatosura dhe se procesi i planit të përhapjes së ushtrisë ishte një procedurë teknike që përgatitej nga Shtabi i Përgjithshëm dhe Ministria e Mbrojtjes.
“Procesi i privatizimit të ish-Klubit Sportiv Partizani deri në momentin e daljes nga plani i përhapjes vinte te Presidenti. Në momentin që dilte prej tij, nuk ishte më përgjegjësi e Presidentit”, dëshmoi Topi.
Sipas tij, dokumentacioni që lidhej me planin e përhapjes vinte në Presidencë vetëm për përmbyllje juridike. Topi deklaroi se privatizimi i ish-kompleksit sportiv “Partizani” ishte në kompetencë të institucioneve qeveritare pasi prona kishte dalë nga plani i përhapjes.
Duke iu përgjigjur pyetjeve të SPAK, ish-presidenti tha se nuk kishte dijeni nëse sektori antikorrupsion në Kryeministri ishte angazhuar për çështjen “Partizani”. Ai gjithashtu pohoi se nuk ishte njoftuar zyrtarisht nga Vladimir Qiriazi për ndonjë problematikë, përveç një takimi dhe konsultimi që kishte pasur.
Topi u pyet edhe për shkarkimin e gjeneralëve, duke deklaruar se nuk e kujton procedurën e saktë, por sipas tij propozimet vinin nga Shtabi i Përgjithshëm i Forcave të Armatosura.
Procesi për dosjen “Partizani” vijon në GJKKO, ku po dëgjohen dëshmitarët e thirrur në gjykimin në themel.
/vizionplus.tv
