Arshin Xhezo, një nga gazetarët më të njohur shqiptar ka ndërruar jetë. Publicisti u nda nga jeta në mënyrë të papritur në moshën 69-vjeçare. Shkak për këtë humbje të parakohëshme të tij mendohet të ketë qënë arresti kardiak.
Gazetari Arshin Xhezo është një ndër emrat më të spikatur të gazetarisë shqiptare, veçanërisht në shtypin e para viteve ’90. Kulmin e tij në këtë periudhë, e shënoi si kryeredaktor në gazetën më të madhe në vend “Zëri i Popullit” ne mesin e viteve ’80, të cilën e ktheu në një tribunë të intelektualëve të njohur, mes tyre dhe Ismail Kadare e Dritëro Agolli. Xhezo është gazetari i parë i cili shkruajti për ruajtjen dhe shpëtimin e hebrenjve në Shqipëri, që në vitet e diktaturës.
Gjatë viteve të tranzicionit, Arshin Xhezo i është përkushtuar kritikës letrare dhe publicistikës. Ai është redaktor i botimit me poezi “Lypësi i kohës” nga Dritëro Agolli, romanit “Kupa e helmit”, i shkrimtarit Dhimitër Xhuvani me të cilin pati një sërë bashkëpunimesh, apo librit “Ardhja e Migjenit në letërsinë shqipe”, me autor Ismail Kadare.
Krahas botimeve letrare Arshin Xhezo ka dhënë kontributin e tij në redaktimin gjuhësor dhe në botimet shkencore, ku spikasin dhjetra bashkëpunime me gjuhëtarin e njohur, Shaban Demiraj, e mjekun, Feçor Agaçi.
Pas një përkushtimi disa vjeçar, me dhjetra përkthime e redaktime, Arzhin Xhezo rikthehet në shtypin e shkruar me disa ese dhe intervista. Ai “shkund” opinionin publik me një rrëfim të sinqertë dhe autokritik me titull “Diktatura na përdori hollë ne gazetarët”, të botuar në vitin 2005, në gazetën Tirana Observer. Më pas, si gazetar i parë që shkruajti për rolin e shqiptarëve në shpëtimin e hebrenjve, Arshin Xhezo, i kushtoi një seri analizash e intervistash kësaj cështje. Ai spikat dhe për kritikën letrare dhe kontributin e veprës poetike, të potetit Xhevahir Spahiu.
Vizion Plus u shpreh ngushëllimin e thellë familjarëve, miqve e kolegëve gazetarë për këtë humbje të rëndë.
