Zgjedhjet për drejtimin e degës lokale të Partia Demokratike në Korçë janë shoqëruar me paqartësi dhe vonesa, teksa Kryesia ende nuk ka shpallur zyrtarisht emrat e kandidatëve.
Megjithëse është njoftuar se procesi zgjedhor do të zhvillohet më 26 prill, burime brenda strukturave bëjnë me dije se deri më tani mungon një vendim zyrtar për listën përfundimtare të garuesve.
Janë katër emra që kanë shprehur interes për të drejtuar degën e PD-së në Korçë: Edmond Cajku, Hergys Haruni, Irvin Bode dhe Bravaldi Xhafka.
Pikërisht për këtë të fundit mbetet një situatë e paqartë. Edhe pse ka shprehur hapur interesin për kandidim dhe aktualisht mban postin e sekretarit organizativ të degës, ka dyshime se Kryesia mund të mos miratojë emrin e tij. Kjo lidhet me pjesëmarrjen e tij në një takim të organizuar nga Ervin Salianji, si dhe me debatet e fundit në rrjetet sociale, ku janë ngritur diskutime edhe për çështje që lidhen me besimin fetar.
Ndërkohë, vetëm 10 ditë para zhvillimit të zgjedhjeve, asnjë nga emrat e përmendur nuk është zyrtarizuar si kandidat, duke krijuar pasiguri për mënyrën se si do të zhvillohet procesi dhe duke shtuar pikëpyetjet mbi transparencën brenda strukturave lokale të PD-së.
