Situata e krijuar nga zjarri në Mal-Milot, në Njësinë Administrative Milot, Bashkia Kurbin, është aktualisht nën kontroll dhe operacioni për shuarjen e plotë të flakëve vijon.
Zjarri u shfaq dje rreth orës 14:45 në shpatin e malit, duke rrezikuar seriozisht edhe banesat pranë zonës së përfshirë nga flakët.
Ndërhyrja në kohë e strukturave shtetërore dhe bashkiake bëri të mundur mbrojtjen e banesave dhe banorëve, pa qenë e nevojshme evakuimi i asnjë familjeje.
Në operacionin për izolimin dhe shuarjen e zjarrit janë angazhuar 4 helikopterë të Forcave të Armatosura, të cilët kanë ndërhyrë gjatë ditës së djeshme dhe sot, si dhe 7 mjete zjarrfikëse me 35 efektivë.
Gjithashtu janë përdorur 2 bote për furnizim me ujë, ndërsa në terren janë angazhuar rreth 50 trupa të FA-së dhe 50 punonjës të strukturave bashkiake, përfshirë Njësinë Administrative, shërbimin pyjor dhe Policinë Bashkiake.
Operacioni është zhvilluar pa ndërprerje, edhe gjatë orëve të natës, pavarësisht terrenit të vështirë.
Në terren për të ndjekur nga afër situatën kanë qenë Prefekti i Qarkut Lezhë dhe Ministri i Mbrojtjes, ndërsa operacioni është drejtuar në koordinim me strukturat vendore dhe të emergjencave civile.
Aktualisht, situata paraqitet e normalizuar dhe nuk raportohet më rrezik për zonën e banuar. Forcat në terren vijojnë punën për shuarjen përfundimtare të vatrave dhe monitorimin e zonës, me qëllim parandalimin e riaktivizimit të zjarrit.
