Ministria për Evropën dhe Punët e Jashtme ka reaguar pas aktivitetit të zhvilluar në Pustec me pjesëmarrjen e Kryeministrit të Maqedonisë së Veriut, Hristijan Mickoski, ku u ekzekutua vetëm himni maqedonas dhe jo Himni Kombëtar Shqiptar.
Në një reagim zyrtar, MEPJ shpreh keqardhje për mosluajtjen e himnit shqiptar, duke theksuar se prania e përfaqësuesve të lartë institucionalë dhe vendorë i jepte aktivitetit një dimension të veçantë publik, pavarësisht se ishte organizuar nga një shoqatë lokale.
Lexo edhe :
Sipas ministrisë, mospërfshirja e Himnit Kombëtar Shqiptar përbën “një mungesë serioze dhe një shmangie nga rregullat e shkruara dhe të pashkruara të mirësjelljes dhe protokollit”.
MEPJ nënvizon se respekti për simbolet kombëtare nuk duhet të trajtohet si çështje politike, por si pjesë e etikës institucionale dhe respektit të ndërsjellë.
“MEPJ shpreh keqardhje për faktin që, në një aktivitet kulturor të zhvilluar dje në Pustec, me pjesëmarrjen e Kryeministrit të Maqedonisë së Veriut dhe të Kryetarit të Bashkisë, nuk u luajt edhe Himni Kombëtar Shqiptar, krahas atij të Maqedonisë së Veriut.
Edhe pse aktiviteti ishte organizuar nga një shoqatë lokale, prania e përfaqësuesve të lartë institucionalë dhe të zgjedhurve vendorë i jepte atij një dimension të veçantë publik. Në këtë kontekst, mospërfshirja e Himnit Kombëtar Shqiptar përbën një mungesë serioze dhe një shmangie nga rregullat e shkruara dhe të pashkruara të mirësjelljes dhe protokollit, të cilat kërkojnë dhe imponojnë respektimin e simboleve kombëtare krahas atyre të komuniteteve që ato përfaqësojnë.
Respekti për simbolet kombëtare nuk duhet të jetë çështje politike apo interpretimi. Ai është pjesë e etikës institucionale, e protokollit dhe, mbi të gjitha, e respektit të ndërsjellë, veçanërisht në një hapësirë ku bashkëjetojnë komunitete dhe identitete të ndryshme.
Në Pustec, ashtu si në çdo hapësirë të Republikës së Shqipërisë, respekti për simbolet kombëtare është pjesë e respektit për vetë qytetarët, për vlerat e bashkëjetesës demokratike dhe kulturës qytetare që na bashkon. Është gjithashtu themel i fqinjësisë së mirë dhe marrëdhënieve të shëndosha ndërmjet njerëzve dhe shteteve tona”, thuhet në reagimin e ministrisë.
