Juan Pablo Guanipa, një nga figurat kryesore të opozitës venezueliane dhe aleat i ngushtë i Maria Corina Machado, u arrestua sërish vetëm pak orë pasi ishte liruar nga burgu. Prokuroria njoftoi se arrestimi u bë me pretendimin se ai kishte shkelur kushtet e vendosura për lirimin e tij, duke folur publikisht për çështjen penale që e përfshin.
Sipas autoriteteve, 61-vjeçari, ish-nënkryetar i parlamentit, kishte detyrimin të mos bënte deklarata publike. Prokuroria i kërkoi drejtësisë që Guanipa të vendoset në regjim arresti shtëpiak. Lirimi i tij kishte ndodhur vetëm dy ditë përpara votimit parlamentar për ligjin historik të amnistisë në Venezuelë, ndërsa ai konsiderohet një nga figurat më simbolike të opozitës së burgosur.
Maria Corina Machado dhe familjarët e tij e kanë cilësuar ndalimin si “rrëmbim”. Machado deklaroi se Guanipa u mor me forcë në Karakas nga persona të armatosur rëndë që përdorën disa automjete, duke kërkuar lirimin e menjëhershëm të tij. Edhe djali i tij, Ramon Guanipa, foli për një rrëmbim nga persona të panjohur, ndërsa partia “Primero Justicia” akuzoi drejtpërdrejt forcat represive të regjimit.
Pak orë pas lirimit të tij, Guanipa ishte shfaqur publikisht pranë një burgu në Karakas, ku u takua me familjarë të të burgosurve politikë dhe foli për mediat. Ai denoncoi rezultatin e zgjedhjeve presidenciale të vitit 2024, duke pretenduar se fitorja e Nicolas Maduro-s u sigurua përmes manipulimeve dhe i mohoi opozitës fitoren.
Në deklarata për AFP, Guanipa kërkoi respektimin e vullnetit të popullit venezuelian dhe zhvillimin e zgjedhjeve të reja. “Më 28 korrik 2024, populli u shpreh qartë. Respektimi i kësaj vullnete është minimumi. Nëse nuk doni ta respektoni, atëherë le të shkojmë në një proces të ri zgjedhor”, u shpreh ai, pak para se të ndalohej sërish.
/vizionplus.tv
