Autoritetet japoneze janë vënë në kërkim të një ariu që dyshohet se ka hyrë në disa banesa në qytetin Shizukuishi, duke kërkuar ushqim në frigoriferë. Sipas autoriteteve, i njëjti ari mund të jetë përgjegjës për 14 raste të ngjashme të regjistruara gjatë dy javëve të fundit.
Rasti më i fundit ndodhi të hënën në mbrëmje, kur 87-vjeçari Mitsuo Matsubara u përball me kafshën brenda kuzhinës së shtëpisë së tij. Ai kishte shkuar të kontrollonte një zhurmë të pazakontë dhe gjeti frigoriferin të hapur, ndërsa ushqimet ishin shpërndarë në dysheme. Bashkëshortja e tij njoftoi menjëherë policinë.
Pas incidenteve të përsëritura, autoritetet kanë vendosur kurthe, gardhe elektrike pranë banesave dhe kanë shtuar patrullimet në zonë për të paralajmëruar banorët. Ekspertët besojnë se bëhet fjalë për të njëjtin ari, pasi vetëm një kafshë është parë të hyjë në ndërtesa gjatë kësaj periudhe.
Në një tjetër incident, një banor e gjeti ariun pranë dhomës ku flinte babai i tij i moshuar. Ai arriti ta trembte kafshën duke përplasur me forcë një derë, por ariu tentoi të hynte sërish në banesë. Burri u detyrua ta mbante derën të mbyllur për rreth 30 sekonda derisa kafsha u largua. Sipas tij, ariu ishte rreth 1.65 metra i gjatë kur ngrihej në këmbët e pasme.
Vetëm një natë më vonë, një grua gjeti një ari në kuzhinën e saj, ndërsa të dielën kafsha hyri në një pastiçeri dhe mori disa donutë nga frigoriferi. Ekspertët thonë se vitet e fundit arinjtë janë afruar gjithnjë e më shumë pranë zonave të banuara, ndërsa ulja e popullsisë në zonat rurale ka bërë që ata të humbasin frikën ndaj njerëzve.
/vizionplus.tv
