Të dhëna të reja kanë dalë nga hetimet e autoriteteve greke lidhur me vrasjen e 49-vjeçarit shqiptar Jani Aliaj, e ndodhur pasditen e 19 janarit në burgun e Koridhalos. Ndërsa fillimisht përgjegjësinë për krimin e mori një i burgosur grek, autoritetet po hetojnë tashmë pistën se autori i vërtetë mund të jetë një person tjetër.
Sipas mediave greke, hetimet janë përqendruar te 44-vjeçari shqiptar Xhuliano Halili, i cili ishte transferuar së fundmi në këtë institucion dhe qëndronte në një qeli pranë asaj të viktimës. Dyshimet ndaj tij janë forcuar pasi Halilit i janë konstatuar plagë të shkaktuara me mjet prerës, çka sugjeron se mund të ketë pasur një përleshje me Aliajn.
Fillimisht, i burgosuri grek Kristos Vardhuniotis ishte vetëdeklaruar si autor i krimit, duke iu drejtuar policisë me fjalët: “Ta dini, unë e vrava”.
Megjithatë, autoritetet po verifikojnë nëse ky rrëfim ishte një përpjekje për të mashtruar hetuesit ose për të mbuluar autorin e vërtetë. Mediat greke theksojnë se 44-vjeçari Halili ka një të kaluar kriminale të rëndë, pasi në vitin 2011 dyshohet se ka vrarë një 35-vjeçar shqiptar për motive biznesi në Kalamata dhe më pas ka kryer edhe vrasjen e fëmijës së tij 2-vjeçar, duke e goditur me thikë në qafë.
Autoritetet greke janë në pritje të rezultateve të analizave laboratorike, të cilat pritet të jenë vendimtare për identifikimin përfundimtar të autorit të vrasjes brutale brenda burgut.
/vizionplus.tv
