Kryetari i Partisë Demokratike, Sali Berisha, ka bërë thirrje qytetarëve që të marrin pjesë në protestat e organizuara në Tiranë, duke akuzuar qeverinë për mungesë reformash dhe për proces zgjedhor jo të lirë e të ndershëm.
Gjatë fjalës së tij në Kuvend, Berisha deklaroi se me qeverinë e kryeministrit Edi Rama ka vetëm “antireformë” dhe se opozita ka marrë pjesë në grupet e punës për reformën zgjedhore dhe atë territoriale me kushtin që të merret ekspertiza ndërkombëtare.
“Me Edi Ramën ka vetëm antireformë. Në mbështetje të përpjekjeve tona për proces zgjedhor të lirë dhe të ndershëm, morëm pjesë në dy grupet e ngritura për këto reforma themelore, Territoriale dhe Zgjedhore. Për reformën zgjedhore të merret ekspertiza e OSBE/ODIHR-it dhe për Territorialen ekspertiza e konferencës rajonale”, tha Berisha.
Ai u bëri thirrje qytetarëve që t’i bashkohen protestave, edhe pse protestuesit kërkojnë largimin e klasës së vjetër politike.
“Ngrihuni në këmbë për të mbrojtur interesat tuaja jetike. Një protestë qytetare e pashembullt për vite mblidhet në shesh në Tiranë. Bashkohuni në protestë”, deklaroi Berisha.
Deklaratat e tij sollën reagimin e deputetes së Partisë Socialiste, Zegjine Çaushi, e cila e kritikoi Berishën për përdorimin e foltores së Kuvendit.
“Sali, ti duhet të jesh i fundit që të vish këtu në këtë Kuvend dhe foltore dhe të flasësh për atë protestë. Më gjej një vend në botë ku protestohet kundër qeverisë, por edhe kundër opozitës dhe liderit të saj”, tha Çaushi.
Deputetja socialiste shtoi se foltorja e Kuvendit nuk duhet të përdoret për dezinformim, duke vijuar me akuza ndaj Berishës.
“Ndryshe nga ty, unë nuk kam privatizuar asnjë pëllëmbë tokë të shqiptarëve, por kam lidhur një kontratë për një apartament që nuk ka nisur. Ti di vetëm të dezinformosh”, deklaroi Çaushi.
