Përfaqësues të Partisë Demokratike po zhvillojnë takime në Berlin, në një moment të rëndësishëm për procesin e integrimit europian të Shqipërisë. Delegacioni i opozitës shqiptare, përbëhet nga Kryetari i Grupit Parlamentar Gazment Bardhi, Kryetarja e Komisionit për të Drejtat e Njeriut Jorida Tabaku dhe Nënkryetari i Komisionit të Sigurisë Klevis Balliu.
Takimi i parë është ai me Peter Beyer, drejtues i Grupit për Ballkanin Perëndimor në Bundestag dhe raporter për Shqipërinë, një figurë kyçe në vendimmarrjen gjermane për procesin e zgjerimit të BE-së. Takimet e tjera janë të fokusuara në çështje kyçe të procesit të integrimit europian, përfshirë funksionimin e shtetit të së drejtës, luftën kundër korrupsionit dhe garantimin e zgjedhjeve të lira dhe të ndershme.
Axhenda përfshin takime me:
* Kryetarin e Komisionit për Europën, Anton Hofreiter
* Kryetarin e Komisionit të Jashtëm, Armin Laschet
* Anëtarin e strukturave për çështjet europiane dhe përfaqësues në Asamblenë Parlamentare të Këshillit të Europës, Knut Abraham
* Kryetaren e Komisionit për të Drejtat e Njeriut, Mechthild Heil
* Deputetin e Bundestagut, Tilman Kuban
* Zëdhënësin për politikën e jashtme, Jürgen Hardt
* Ministrin e Shtetit për Europën në Ministrinë e Jashtme Federale, Günther Krichbaum
