Të moshuarit nuk i ndahen bujqësisë, çifti i bashkëshortëve prej 12 vjetësh merren me kultivimin e pjeshkëve
Prej më shumë se 12 vitesh, Aqif Xhakoi, 74 vjeç, dhe bashkëshortja e tij 68-vjeçare merren me kultivimin e pjeshkës ne fshatin Klos të Cërrikut. Pavarësisht moshës, ata vijojnë të punojnë çdo ditë në parcelat e tyre, pasi mungon krahu i punës dhe fëmijët i kanë jashtë vendit.
Shpenzimet janë të larta, thonë ata, ndërsa mungesa e një pike grumbullimi i detyron t’ua shesin prodhimin tregtarëve me çmime shumë të ulëta, deri në 20 lekë për kilogram.
Një pjesë e prodhimit mbetet pa u shitur dhe përfundon në tokë.
“Është për të qarë, se i kam bërë shërbimin gjithë dimrin, kemi ndenjur këtu dhe kur vjen puna, bien në tokë”, thotë 68-vjeçarja.
Fermerët kërkojnë mbështetje nga shteti, veçanërisht kompensimin e naftës dhe krijimin e një pike grumbullimi, në mënyrë që prodhimi i tyre të mos përfundojë i pashitur.
