Aktori i madh shkodran Zef Deda sot feston ditën e tij të lindjes.
Në këtë ditë kaq të veçantë të 66-vjetorit të tij sigurisht që nuk mund të mungonte urimi i të birit Julian Deda, i cili ka dashur ta ndajë me të gjithë ndjekësit në Facebook dedikimin për të atin.
“Bosi i familjes Deda.” – kështu e quan Juli Zefin, të cilit i kushton disa rreshta të mbushura me emocion për marrëdhënien prind-fëmijë, për vitet që kalojnë pa kuptuar dhe për mësimet që Zefi i ka dhënë fëmijëve.
Ky është shkrimi i plotë i aktorit të “Apartamenti 2XL”:
“Sot ka ditëlindjen Bosi i familjes Deda. Babush, u bëfsh 100 vjeç.
Ditëlindjet e prindërve janë absolutisht ditë të gëzueshme, por po të tregohemi të sinqertë me veten, duhet të pranojmë se nganjëherë se si ndjehemi, kur shohim vitet që kalojnë dhe nuk kthehen më. Por kjo është jeta dhe ne duhet të gëzohemi edhe në këto raste, të jemi pozitiv. Pikërisht këtë na ke mësuar gjithë jetën Babush. Madje vazhdon e na e ushqen me të njëjtin intensitet, ashtu me fjalë të thjeshta, ashtu shkurt e saktë.
Na ushqen me pozitivitet, me energji dhe mbi të gjitha na injekton përditë e më shumë, të qenit një njeri pa hile. Kjo moto e jotja është shumë e rëndësishme për ty, dhe sigurisht edhe për mua.
Unë mund të rreshtoj këtu mijëra fjalë, por më mirë po e bëj sipas mënyrës tënde, shkurt dhe saktë: Je më i miri. Të du fort.”
