Eksperti i Ekonomisë Ergis Sefa ka folur në studion e Quo Vadis për problematikën e pensioneve në Shqipëri.
Sefa tha se çdo ndryshim i skemës së pensioneve do të ndikonte kryesisht te brezat që ende nuk kanë dalë në pension dhe jo te pensionistët aktualë.
Sipas tij, reforma duhet të ketë dy objektiva, zgjidhjen e situatës aktuale dhe garantimin e një skeme më të qëndrueshme për brezat e ardhshëm.
Duke komentuar shqetësimin e pensionistëve që kanë kontribuar për më shumë se 40 vite, por marrin pensione të ulëta, Sefa tha se kjo është pasojë e reformave që duhet të ishin ndërmarrë shumë vite më parë.
Ai theksoi se një nga zgjidhjet është rritja e pagave në tregun e punës, pasi pagat më të larta sjellin edhe kontribute më të mëdha për skemën e pensioneve.
Pjesë nga biseda:
Sefa: Nëse bëjmë prapë një skemë, një ndryshim skeme, ajo targeton personat si ne që jemi aktualisht mund të dalim në pension nesër. Jo ata që kanë dalë tashmë. Ata që kanë dalë tashmë i zgjidh vetëm në qoftë se ti rregullon tregun e punës në të cilin ti arrin të mbledhësh më shumë të ardhura që pastaj çon tek fondi i pensioneve dhe gradualisht t’i rritësh pensionet. Të dyja janë të bëshme sepse ti ke nevojë të zgjidhësh jo vetëm emergjencën sot, por edhe të sigurosh që në afatgjatë, kur dalim ne në pension mbas dekadash, të mos kemi prapë mbas dy-tre dekadash të njëjtën situatë si prindërit tanë apo si gjyshërit tanë, sepse do ishte absurd.
Borakaj: Ka një trishtim shumë të madh mes pensionistëve kur mendojnë që kanë kontribuar mbi 40 vjet edhe kanë pensione qesharake.
Sefa: Absolutisht po, ky është problemi që ne duhet t’i kishim nisur këto reforma strukturore dekada përpara. Ka diçka që mund të bëhet dhe që deri diku po bëhet: e para, të rregullohet tregu i punës që do shkojë drejt pagave më të larta, sepse sa më të larta të jenë pagat në tregun e punës, aq më shumë është kontributi, jo vetëm për ty që del nesër, por edhe për ata që janë përfitues sot. E dyta, sektorët inovativë, të cilët jo vetëm kanë paga më të larta, por kanë paga më të larta në rritje në afatgjatë. Pra, nuk është se ti pret që të marrësh pagë të lartë vetëm për një periudhë të caktuar për pak vite dhe pastaj ke rrezik që të bjerë, por sektorët inovativë gjithmonë e rrisin produktivitetin dhe shkojnë gjithmonë e për më lart, ndikojnë gjithmonë e më shumë.
/vizionplus.tv
