Një 66-vjeçar, Irakli Çinoku, ka humbur jetën pasi dyshohet se i ka dhënë fund jetës duke u vetëdjegur brenda automjetit të tij pranë banesës në Korçë. Sipas policisë, para aktit ai kishte lënë një letër të gjatë ku përmendte vetminë dhe probleme në marrëdhëniet familjare.
Mendohet se 66 vjeçari Irakli Çinoku ka përcjellë ditën e djeshme gruan e tij drejt Athinës, aty ku jetojnë e dy fëmijët e tyre ndërsa mëngjesin e sotëm në gjendje të rëndë mendore ka ndërmarrë aktin fatal.
Sipas fqinjëve, pensionisti njihej si person i rregullt dhe nuk kishte konflikte me askënd
“I thash sot mirëmëngjes. Ishte i martuar me dy fëmijë. Ishte njeri jashtëzakonisht i rregullt. Gruaja e tij iku dje në Athinë. Ishte person i shkëlqyer, familjarë, shohin punën e tyre”, u shpreh fqinja.
Edhe sipas policisë, Irakli Çinoku ka djegur veten ndërsa para këtij veprimi ai ka lënë një letër të gjatë, përmbajtja e të cilës flet për vetmi dhe marrëdhënie jo të mira mes familjes.
Jashtë kamerave, njeri nga familjarët e 66 vjeçarit të vetdjegur në makinë u tha gazetarëve; “Shqetësimi i vetëm i Irakli Çinokut ishte për banesën e vet. Gjithë leket ne emigrim i investoi në këtë shtëpi ndërsa kishte leje ndërtimi por bashkia nuk i kolaudonte shtëpinë, tja jepte cerefikaten e përdorimit sepse kishte bërë një dritare shtesë. Dhe gjithë kohën ai e vuante, e vetmja bisedë që bënte ishte për shtëpinë, “përse bashkia nuk me jep lejen që më duhet” – thoshte, ndaj, e për këtë mund ta ketë ndërmarrë aktin e rëndë ”
Hetimet vijojnë për të kuptuar gjithçka rreth kësaj çështjeje, ndërsa trupi u dërgua në morg ku do të kryhet autopsia për të dokumentuar arsyen e vdekjes së 66 vjeçarit.
/vizionplus.tv
