Kryeministri Edi Rama, këtë pasdite është ndalur në Theth ku ka zhvilluar një bashkëbisedim me banorët në kuadër të “Paketës së Maleve”.
Shefi i qeverisë u ndal te rëndësia e kësaj zone si një nga shembujt kryesorë të potencialit turistik dhe ekonomik të zonave malore. Rama foli për keqkuptimet rreth nismës dhe sqaroi qëllimin e saj, duke theksuar se ajo synon t’u japë mundësi trashëgimtarëve të pronave që të zhvillojnë tokat e tyre.
Rama: Thethi ka qenë një nga arsyet e Paketës së Maleve dhe është një nga pasqyrat më shembullore të potencialit, të aftësive për të bërë sukses dhe problematikave që duhen adresuar. Ajo që duhet thënë që në fillim është se për Paketën e Maleve ka një keqkuptim shumë të madh. Është shumë e rëndësishme që të gjithë ata që kanë një pronë të trashëguar dhe që janë jashtë perimetrit të legjislacionit ekzistues të 7501 të dëgjojnë dhe të kuptojnë deri në fund se për çfarë bëhet fjalë dhe të mos bien pre e ligësive që thuhen për këtë proces dhe për Paketën e Maleve.
Ai kundërshtoi pretendimet se kjo nismë favorizon persona apo interesa të caktuara. Gjatë bashkëbisedimit me banorët e Thethit, Rama theksoi se fokusi i paketës është aktivizimi ekonomik i trashëgimtarëve të pronave në zonat malore dhe krijimi i mundësive për zhvillim përmes turizmit.
Rama: Paketa e Maleve është e kundërta e të gjitha këtyre që thuhen. Paketa e Maleve nuk është as për uzurpues, as për biznesmenë që nuk kanë lidhje dhe marrëveshje me ju, as për oligarkë, as për asgjë tjetër, përveçse për të vënë në lëvizje ekonominë e trashëgimtarëve të pronave, në territore ku toka nuk është ndarë sipas 7501 sepse ju dhe të tjerët në këto territore nuk e kanë pranuar 7501, e kanë ndarë tokën mes veti me kufijë e vjetër dhe përgjithësit nuk kanë konflikte me njëri-tjetrin, por dhe për të adresuar aspektin tjetër që ka të bëjë me territore ku nuk ka asnjë mundësi tjetër zhvillimi përveç turizmit. Kjo është Paketa e Maleve dhe këtu jemi në një tokë trashëgimtarësh.
