Një kallëzim penal është depozituar në lidhje me çështjen e abuzimit të dyshuar me fondet në filialin e Postës Shqiptare në Durrës.
Bashkëshorti i ish-drejtoreshës së këtij institucioni ka depozituar një kallëzim penal ndaj ish-shefes së Financës, Valbona Duni, duke ngritur dyshime për pastrim parash dhe krijim të pasurisë së pajustifikuar.
Lexo edhe :
Related Posts
Kallëzimi është dorëzuar dy ditë pasi Gjykata caktoi ndaj Valbona Dunit masën e sigurisë “arrest në shtëpi”.
Ndërkohë, ish-drejtoresha e Postës Durrës, Elisabeta Mataj, vijon të mbahet në masën e sigurisë “arrest në burg”.
Të dyja, së bashku me arkëtaren Paola Dana, janë nën hetim pas kallëzimit të Postës Shqiptare, të dyshuara për veprën penale të vjedhjes duke shpërdoruar detyrën në bashkëpunim.
Në kallëzimin e depozituar më 20 korrik, Feta Mataj pretendon se bashkëshortja e tij është bërë padrejtësisht përgjegjëse për skandalin financiar, ndërsa kërkon që hetimet të shtrihen edhe ndaj ish-shefes së Financës.
Sipas tij, verifikimet që ka kryer privatisht kanë ngritur dyshime se Valbona Duni zotëron pasuri që nuk justifikohen me të ardhurat e deklaruara nga paga e saj. Për këtë arsye, ai kërkon që organet e drejtësisë të hetojnë burimin e pasurisë, si edhe aktivitetin ekonomik të familjarëve të saj.
Në kallëzim pretendohet se ish-shefja e Financës dhe dy fëmijët e saj disponojnë automjete luksoze të viteve të fundit, disa apartamente në Durrës dhe Tiranë, si edhe biznese të hapura gjatë viteve të fundit.
Sipas kallëzuesit, këto aktivitete mund të jenë përdorur për të justifikuar të ardhura me burim të paligjshëm, duke ngritur dyshime për pastrim parash.
Ai ngre gjithashtu dyshime se pasuria e familjes Duni është shtuar ndjeshëm pas vitit 2020, periudhë që përkon me administrimin e fondeve të rindërtimit pas tërmetit nga Posta Shqiptare, duke kërkuar që këto rrethana të verifikohen nga organet kompetente.
Në kallëzim kërkohet një hetim i plotë pasuror dhe financiar për Valbona Dunin dhe familjarët e saj, si edhe verifikimi i çdo bashkëpunimi të mundshëm në administrimin e fondeve publike gjatë viteve 2020 e në vijim.
Feta Mataj deklaron gjithashtu se bashkëshortja e tij kishte sinjalizuar më herët problematika në sektorin e financës, por, sipas tij, shqetësimet e ngritura nuk ishin marrë në konsideratë nga drejtuesit.
Policia e Durrësit bën me dije se kallëzimi do t’i përcillet Prokurorisë, e cila do të vlerësojë pretendimet dhe do të vendosë nëse do të regjistrojë procedim penal dhe do të nisë verifikimet për akuzat e ngritura./vizionplus.tv
