Një vit pas shembjeve të ndërtimeve pa leje në Theth, Kryeministri Edi Rama është rikthyer në këtë zonë turistike, ku ka folur për ndërhyrjet e kryera dhe debatin mbi legalizimet. Gjatë bashkëbisedimit me banorët, Rama hodhi poshtë pretendimet se vizita e tij e mëparshme kishte shërbyer si sinjal për ndërtime të reja, duke sqaruar se legalizimet, sipas tij, do të lidhen vetëm me objektet ekzistuese dhe jo me ndërtimet e reja pa leje.
Rama: Është hera e parë që vij këtu pas tritolit (shembjeve të ndërtimeve pa leje). Është tërësisht e pavërtetë që unë kam ardhur këtu dhe kam thënë: vazhdoni ju ndërtoni se ne do t’i legalizojmë. Kjo nuk është e vërtetë. Unë kam ardhur këtu dhe kam thënë që do legalizojmë ekzistueset, do legalizojmë duke filluar nga ndërtimet e vjetra. Edhe ata që kanë trashëguar kulla në një zonë si kjo, e cila është Park Kombëtar i Mbrojtur, nuk kishin letra.
Ajo që unë kam thënë dhe i kemi qëndruar pikë për pikë është: do legalizohen ata që ekzistojnë. Ajo që ndodhi dhe ju e dini shumë mirë ishte që pas vizitës sime shpërtheu ndërtimtaria e paligjshme këtu. Me idenë që, meqë do legalizohen, hajde po futem. U arrit të goditej zemra e Thethit.
Po të shkruash Theth në të gjitha gjuhët e botës, pamja e parë që të del është kisha me lëndinën e gjelbër. Lëndina e gjelbër u zaptua, u vunë me shpejtësi disa shtëpi druri, u rrethua, u shtrua me zhavorr dhe u kthye në një plagë mu në mes të Thethit. Si mund t’i lejonim ne këto?
